Hajiji ruminamit ‘potret’ disio i omulok po mantad di Pandikar Amin.
PENAMPANG: Boyoon Montiri, Datuk Seri Hajiji Haji Noor minoboros, oponsol o rayat do misompuru mooi do Sabah kagaras om amu’ nuru’ tumalahan kumaa pulitik tangagayo di suai.
“Nung osompuru om agaras tokou, kaanu tokou monsupu’ konosipan pulitik tokou sondiri.
“Mantad dilo’, monimbar oku ponuhuan montok monimung lalansanon Sabah id siriba’ Gabungan Rakyat Sabah (GRS),” ka disio id kinopoimaganan longkod upis Kotinanan Kabansaan Sabah Bersatu (USNO) id Wisma USNO doid Donggongon Avenue, do hiti, di songkosodop.
Minoboros isio, tingkananon pinonuridongan GRS nopo nga’ montok toinsanan parti nokoiyonon id Sabah misompuru id siriba’ iso’ dolundung.
Hajiji suminain plak pongingitanan kinopoimaganan Wisma USNO id Penampang di songkosodop.
Ka disio, okon ko iso’ karaja’ asanang montok mogowit lalansanon sumuang GRS miagal di Tan Sri Pandikar Amin Mulia (USNO), Datuk Seri Yong Teck Lee (SAPP), Datuk Seri Dr .Jeffrey Kitingan (Star), Datuk Seri Dr. Maximus Ongkili (PBS) om noondo duo po io’ Datuk Datuk Chin Su Phin (LDP) om i Tan Sri Liew Yun Fah (Parti Harapan).
“Ogumu’ kohimpogong om kaantaban nga’ angkab ku montok monimung koinsanai lalansanon diti nopo nga’ pointulid ginawo. Mimang oku do Sabah koburu’ om pantangon,” ka di Hajiji, i po nogi’ Ponorikohon GRS.
Pinoposorou isio pulitik nopo nga’ amu’ atatap om kaanu sumimban tumanud timpu om koyuon i nokopokito Sabah nokoolon koporintaan do impipiro minimpuun mantad USNO, Berjaya, PBS, BN, Warisan, Bersatu om noondo diti GRS.
Hajiji tinanud di Pandikar Amin sinuau dilo’ puru USNO id kinorikotan disio doid ababayan kinopoimaganan doid Donggongon Avenue, Penampang di songkosodop.
Hajiji nosudu’ soira’ kohondom di kinogompitan disio id pulitik i minimpuun mantad USNO di 1990 soira’ disio pinili’ sondiri’ di Presiden USNO ontok dilo’ Allahyarham Tun Mustapha Datuk Harun do tuminanding id Sulaman.
“Id suang oku do surupukaraja’ koporintaan om amu’ insan kopomusorou do sumili tulun pulitik nunu podi USNO i id suang pembangkang di ontok dilo’. Oilaan ku do okon ko’ asanang montok sumili ADUN pembangkang nga’ katalib minomusorou pipiro minggu ruminamit ku om nakalantoi,” ka disio.
Komoyon disio kinalantaion dau dilo’ mantad no do inggisaman USNO i osomok id ginawo rayat.
“Hilo’ no do nokotimpuun pimburuan ku id pulitik. Mantad dilo’ amu’ oku bakangon soira’ nalap di Tan Sri Pandikan montok popoimagon kopoimpuunan Wisma USNO do sodop diti. Nokorikot oku sabab kosorou om mamantang koinsanai di pinowonsoi do USNO kumaa doho’,” ka disio.
Hajiji minamason nogi’ puru om mononokodung USNO do tumilombus mungkakat id dohuri di Pandikar Amin id inggisaman monuridong kawagu parti montok sumili agaras id GRS.
Talib dilo’, i Hajiji tinanud di Pandikar Amin suminain plak pongingitanan pogulu kuminakap linimput Wisma USNO.
Nokotindapou nogi’ i Puru Kounsol Akawas USNO, ADUN UMNO Usukan, Datuk Salleh Tun Said, Luguan GRS Kota Kinabalu, Datuk Faisyal Yusof Hamdain Diego om lansanon GRS.
