Tun Musa (kotolu, gibang) pinapatahak ponguhupan kuminaa songulun mantad di nogompitan i pinoiyon id PPS Dewan Huguan Siou, Kg. Tuavon.
PENAMPANG: Molohingon Agayo Pogun, Tun Musa Aman ruminuba’ di tongo’ nogompitan liyud id duo Longkod Poundolihan Naamot (PPS), di tadau Koduo.
Duo PPS di nokohompit nopo nga’ PPS Dewan Meruntum, Putatan om Dewan Huguan Siou Kg. Tuavon, Penampang.
Tun Musa pinapatahak bakul takanon nogi’ ponguhupan tusin tunui kuminaa paganakan i noinggorit gama-gama’ kadaat liyud.
Nokotindapou nogi’, Montiri Koburuon Mogigiyon om Kasasanangan Rayat, Datuk James Ratib; Pesuruhjaya Pulis, Datuk Jauteh Dikun; Monunurat Pisompuruan, Datuk Mohd Razali Wahab om Potunud Koupisan Kotundunan Mogigiyon, Jais Asri.
PPS Dewan Meruntum noondo diti nokopo’iyon 121 nogompitan mantad 33 Luguan Suang Walai (KIR), kaampai songulun bagang kiumur sombulan, naamot PPS Dewan Huguan Siou Kg. Tuavon nopo nokopo’iyon 152 nogompitan mantad 35 KIR miampai nogompitan kiumur pialatan duo gisom 79 toun.
