Dr. Joachim (poindikau, tanga’) guminambar miampai tongo’ Luguan Watas om oinsanan i nokotindapou id pitimungan Tongo’ Luguan Adat Pogun Sabah 2025.
KENINGAU: Pitimungan Tongo’ Luguan Adat Pogun Sabah 2025 di tadau baino’ pinopoloting koponsolon monginggirot kotinanan adat maya’ ponuridongan Puruankuasa’ Monontuduk Undang-Undang i buruanon di Luyar Anak Negeri, suai ko’ kopokionuan kousinan pinotomod montok momogompi’ kogunoon adat sabaagi impohon pisompuruan om koburuon mogigiyon.
Kumoduo Boyoon Montiri II, Datuk Seri Dr. Joachim Gunsalam minoboros, inggisaman dilo’ kopokito adat okon ko’ susuyan kahandaman nopo, nga’ nosili intodonon ginaras id koponuridongan pisompuruan om komogoton Sabah.
“Pitimungan diti nosili koiyonon bobos osonong montok mogiboboros haal ngaawi’ kopohompit koponsolon Mamasok Pogun, kaampai atag monuridong Puruankuasa’ Undang-Undang, mokianu ‘dana’ montok monginggirot kotinanan adat, nogi’ poposotol kawagu koponugatan kohondot kaadangon Watu Sumpah Keningau,” ka disio ontok pinopoimagon pitimungan dilo’ id Lintuhun Salingkawang, Longkod Tinunturu’ Sabah, do hiti, konihab.
Dr. Joachim minoboros, Watu Sumpah Keningau i pinogirot di 1963 kakal nosili kokitanan batos mongumolig kopotutan ngaawi’ rayat Sabah i jominon id kinoponuridongan Malaysia, potilombus dino kosili posunduran kopoburuan kotinanan adat gisom no do tadau babaino’ diti.
“Inggisaman diti oponsol montok monimbuat tonggungan kotinanan adat sabaagi mananamong tungkusan om koubasanan Mamasok Pogun, suai ko’ kosili tambalut kosudong koporintaan id kopotontuan koburuon pogun kapanau kopiongoi di pomogompian kointutunan nogi’ susuyan kahandaman tokou,” ka disio pinopointalang.
Dr. Joachim (tanga’) tuminabi’ om ruminuba’ dilo tongo’ tutumanud pitimungan dilo’.
Dr. Joachim nga’ pinoposotol nogi’ do kopongonjuran pitimungan dilo’ kopihunung di pamaramaian Tadau Malaysia do 16tw Kosiam, i momuhondom kinotonudan Sabah id pinonuridongan Pisompuruan Malaysia.
Ka disio, ‘resolusi’i nosigampot id pitimungan dilo’ kalansanan kapanahak koundaran kumaa mogigiyon om pogun, potilombus dino monginggirot piromutan pogialatan tinaru montok kasasanangan rayat Sabah.
Pitimungan pinaanjur Kounsol Haal Mmamasok Pogun Sabah (MHEANS) dilo’ nokopotimung tongo’ Luguan Watas mantad tikid watas.
Nokotindapou nogi’ Monunurat Komontirian Koporintaan Koiyonon om Pomuwalaian, Datuk Dr. Jamili Nais; Presiden MHEANS Sabah om Upisor Komogoton Mogigiyon DUN Bingkor, Tinus Majip.
