Tun Musa Aman
KOTA KINABALU: Molohingon Agayo Pogun Sabah, Tuan Yang Terutama Tun (Dr.) Musa Haji Aman pinoposotol do pisompuruan rayat Malaysia i mogisuai tinaru, ugama’ om koubasanan nuru’ tilombuson inggiratan montok no kaadangon om komogoton pomogunon.
Id pason disio kopihondot pamaramaian Tadau Malaysia ko-62, Tun Musa minoboros Malaysia noturidong mantad sunduan pisompuruan, pogihunungan om ‘visi’ aagal di 16tw Kosiam 1963 soira’ Malaya, Sabah om Sarawak miniiso’ minonuridong songinan pisompuruan.
“Malaysia noonuan kopogisusuaian tinaru, koubasanan om ugama’ di ogumu’. Kopogisusuaian diti amu’ apatut kosili intodonon pogiuriasan, nga’ kinodou di koponompuru dati’,” ka disio.
Pinosotol disio do tonggungan Sabah om Sarawak id pinonuridongan pomogunon agayo kopio, kaampai kinouhupan kumaa kaadangon pulitik, kinosunion sosio ikonomi om kopogisusuaian koubasanan Malaysia.
Sundung ingkaa, ka disio, kakal ogumu’ inggisaman i nuru’ powonsoiyon montok mongingkoro’ pisuayan koburuon id Sabah. “Sabah di lobi agaras koposili Malaysia lobi ogirot. Koburuon mositi’ no do korikot id tikid dusuk-usuk pogun mooi do aiso’ oiduanan,” ka disio.
Tun Musa nga’ pinoposorou do aiso’ koiyonon montok koyuon ‘fanatik’ tinaru toi ugama’ id pomogunon diti nung Malaysia orohian kotilombus koburu’. Ka disio, Sabah nopo nga’ poomitanan bobos osonong piuludan mogigiyon mogisuai tinaru i poinpasi oulud id koyuon sopipantang.
Pinokianu disio oinsanan lansanon pulitik do monoibau koponsolon okikip nogi’ amu’ moninong pogiuriasan montok koundaran pulitik. “Nga’, tongo’ lansanon nuru’ moningkanan kumaa pomusarahan tosonong, panalasaian ‘praktikal’ om tongo’ katatapan ngaawi’ i kopogoris do rayat,” ka disio.
Daamot dilo’, io’ Tun Musa dii Toh Puan (Seri Datuk Faridah Tussin) pinopolombus nogi’ kosianan kumaa paganakan nogompitan liyud om tana’ nopiang gama-gama’ rasam po’ompus id Sabah i nokoporundun niawa nogi’ nokoowit kinaraagon tongo’ harata’.
“Id timpu oinggorit diti, pokionuon ku mogigiyon di noinggoritan do monidsorou om mananud ponudukan bohogian kikuasa’. Kanou tokou no oinsanan papatahak ponguhupan mooi do koponondulianan aanu popoindalan maya’ sunduan kinotoboion om mitatabang,” ka disio kawagu.
Tun Musa minagangat rayat monginwagu tonggungan kumaa ‘solidariti’ (pogisokodungan), kaadangon om komogoton.
“Oinsanan tokou, mogipapantang om sondikoton di piilangan ngaawi’, tumilombus tokou monuridong songinan Malaysia di otoronong, koburu’ om ogirot,” ka disio i minamsaon Kounsikahan Tadau Malaysia.
