Hajiji kuminakap nohompitan kadaaton liyud id Longkod Poiyanan Naamot (PPS) Dewan PPR Keramat, Putatan, di konihab.
PENAMPANG: Boyoon Montiri, Datuk Seri Haji Hajiji Haji Noor minindahu’ minooi intong koyuon di nogompitan liyud om tana’ nopiang i pinoiyon id Longkod Poundolihan Naamot (PPS) do hiti om Putatan, di konihab.
Minonimpuun isio pinogintongan id PPS Kampung Sarapung i pinopo’iyon nogompitan liyud om tana’ nopiang di jaam ko 5.30 sodopon, pogulu pinaangayan doid Putatan do talib dilo’.
Sundung asapou rasam, Hajiji mokimokit sondiri koyuon di nogompitan montok pinopolombus kopusohon di konosipan diolo’, om pinapatahak ponguhupan mantad koporintaan.
Id PPS Kampung Sarapung, i Hajiji nonuan kopointalangan di Kumoduo Presiden Kounsol Kakadayan Penampang (MPPg), Normi Dyena John Tren pogulu pinopoikid ponguhupan kuminaa di 40 Luguan Suang Walai (KIR).
Ponguhupan kapaampai tusin om bakul takanon dilo’ pinatahak do Puruankuasa’ Ponguludan Kadaaton Sandad Pogun (JPBN) montok papagaan koinggoritan di nongogompitan liyud, suai ko’ papatantu’ kotundunan diolo’ toririmo poinjamin po’ompus diolo’ id PPS.
Hajiji pinapatahak ponguhupan kumaa nogompitan kadaaton liyud id Longkod Poiyanan Naamot (PPS) Kampung Sarapung, Penampang ontok minooi kakap PPS dilo’ di konihab.
Ka di Hajiji, koporintaan pogun maya’ JPBN toririmo sumosodia’ id kapanahakan ponguhupan osikap kumaa rayat i potoguang kaantakan araat, lolobi no ontok timpu rasam gumompus.
“Koporintaan amu’ bakangon id haal kotundunan rayat. Tikid nogompitan kadaaton uhupan poinpatut mooi do amu’ yolo’ kopuriman koindisan,” ka disio.
Minonongkounsikou nogi’ isio kumaa kotinanan koporintaan, tinimungan koumoligan om ‘sukarelawan’ i mininggisiom mongulud PPS om minonguhup popoundaliu nogompitan liyud miampai poumolig.
Ka disio, piuhupan ogirot oinsanan bohogian oponsol kopio id kopotontuan koumoligan, kosimbayanan nogi’ kotundunan rayat toririmo kosili posuulon soira’ potoguang kadaaton sandad.
Naamot dilo’, minongomi kotilombus karait kotombuluyan disio, ka di Hajiji, isio miampai JPBN i binuruan di Monunurat Koporintaan Pogun (SKN), Datuk Seri Sr. Safar Untong mokimokito lobi kosomok koyuon liyud id pipiro kinoiyonon di naantakan.
“Yoho’ om Puruankuasa’ Ponguludan Kadaaton Sandad Pogun i buruanon SKN minooi tingan minintong id kinoiyonon do mongilo kopio koyuon di naantakan mooi do oilaan tokou liyud, tana’ napiang om sopiagal dilo’ montok dati’ manahak ponguhupan kumaa di nongompitan.
“Koporintaan manahak ponguhupan sangadau duo tadau diti. Oinsanan nogompitan liyud, tana’ nopiang onuan otkou ponguhupan koporintaan pogun om Pisompuruan. Bohogian Yayasan Kotundunan Pogun nga’ manahak nogi’ do ponguhupan,” ka disio soira’ rinubaan magaganu habar.
Id timpu miagal, pinoposorou isio oinsanan mobi’ rayat om Ponorikohon Puruankuasa’ Ponguludan Kadaat Watas (JPBD) mo miontong-ontong koyuon kadaaton id kinoiyonon sompoopori.
Komoyon disio kadaaton i notoguang pipiro watas id Sabah diti baino’ poindaadala’ nosusuhut liyud om tana’ nopiang i nokoponginggorit ogumu’ mogigiyon om kinoiyonon.
“Okon nopo ko’ liyud, nga nogi’ naantakan tana’ nopiang om pangaba’ lotirik nogi’ waig nga’ noputut, adadalaan diti baino’. Ilo’ pogi’ do amu’ tokou pinabaya’ pamaramaian Tadau Malaysia do suab (tadau baino’) tu’ lobi tokou opoduli’ montok monguhup di nogompitan i nokohompit id pipiro watas i naantakan kadaaton diti,” ka disio.
Daamot dilo’, id Putatan, Boyoon Montiri minooi nogi’ kakap di nogompitan liyud i pinoiyon id PPS Dewan Seri Keramat doid Ketiau om pinapatahak ponguhupan kumaa 40 KIR nohompitan, pogulu pinakaya’an id Dewan PPR Seri Serigai kuminakap di 56 KIR nohompitan i pinoiyon do hilo’.
Pinopolombus nogi’ isio pongunsikohan kumaa Agensi Ponguludan Kadaat Negara (NADMA) i pinoposodia’ RM10 riong ponguhupan kadaaton kumaa Sabah.
Ponguhupan dilo’ pinahabar di Luguan Montiri, Datuk Seri Anwar Ibrahim sabaagi pomoruhang kumaa kopoobian RM11 riong i pinosodia’ koporintaan pogun montok monoibau kadaaton sandad i notoguang rayat pogun diti.
Nokopogulu, i Hajiji minooi nogi’ intong koyuon tana’ napiang id Jalan Tun Fuad Stephens id toguang do Longkod Konvensyen Sompomogunan Sabah (SICC) doid Tanjung Lipat.
Kinotombuluyan ‘turun padang’ dilo’ natanud nogi’ di Montiri Ponombuluyan, Koubasanan om Sandad Posorili’, Datuk Seri Christina Liew; Safar om Monunurat Pisompuruan Sabah, Datuk Mohd. Razali Wahab.
