Abidin pinopoimpuun ababayan Walk for Jesus-Hope 2025 id Padang Merdeka di tadau baino’.
KOTA KINABALU: Boyoon Montiri, Datuk Seri Haji Hajiji Haji Noor minanahak jominan do koporintaan pogun mongigit ogirot kumaa prinsip kaadangon om kaadason miampai manahak sokodung po’ompus amu’ momuntuk tinaru om ugama’.
“Tonggungan po’ompus tokou montok monginggirot sokodung balajaran nogi’ kotinanan okon mimpau ugama’ pointatap ogirot, montok posuni pisompuruan, piuludan om pogitimbangan kiugama,” ka disio id Ababayan ‘Walk for Jesus-Hope 2025’ i pinaanjur do Kounsol Gereja-Gereja Sabah, tinimungan nayatan gereja nokoiyonon nogi’ Koisaan Pisompuruan Pomojiilan Sabah (PFSA) id Padang Merdeka do hiti di baino’. Boboroson disio pinolombus di Monguhup Montiri Kumaa Boyoon Montiri, Datuk Abidin Madingkir.
Boyoon Montiri minanangkabayahan nogi’ kumaa manganganjur tu’ nakapaanjur ababayan insan suang duo toun (dwitahunan) dilo’, i komoyon disio sabaagi kointalangan sunduan ‘kohesi’ (pisompuruan) id nayatan mogigiyon Kristian id Kota Kinabalu om pototongkop pogun.
“Kinopoindalanan aandad Walk for Jesus id 26 kakadayan doid Sabah otootopot kopokito pisompuruan id sambayang om sondikoton,” ka disio.
Hajiji minoboros, pamanahan ‘rohani’ di kirati diti nosili kointalangan ginirot kotumbayaan tulun Kristian, potilombus dino kopohimagon kinohinoon Tuhan i toririmo poingampai om kinosunduon Dau id koposion diolo’.
“Mamanau id piuludan ‘ilahi’ nopo nga’ nawawaya’an di koponimbuat ginawo, i potuu id tinan toi ko’ rohani, kopokito ginaras sokodung toinsanan nogi’ kotolibamban do kinorontobon tinan tokou.
“Kalansanan ku ababayan diti koowit kawanadan kumaa rayat Sabah, titimpu dokoyu oinsanan maya’ do tongo’ kakadayan miampai doa nogi’ monimung sokodung montok tinimungan amu’ songkuro kinonosipan.
“Angkab olidang dokoyu otootopot kopokito pogilisihan poinpuli gereja i kadarapas do tinaru, ugama om kotumbayaan. Inggisaman miagal diti tantu’ no do kapatanom kotumbayaan, pisompuruan om sunduan oulud id mogigiyon tokou,” ka disio.
