Dr. Joachim (koduo, wanan) minooi intong pokikitanan.
KOTA KINABALU: Siktor ponombuluyan om kopoburuan harata’tana nosili posiau koponsupuan pakarjaaan, kopongindopuan nogi’ kotumbayaan timpu anaru kumaa timpu dumontol ikonomi Sabah, ka di Kumoduo Boyoon Montiri II, Datuk Seri Dr. Joachim Gunsalam.
Pinokianu disio siktor koporintaan om swasta monginggirot piuhupan kumaa kosunion di poinpuli, ogirot om kipomusarahan osodu’.
“Mamaso tokou monompon tabir PropEX 2025, unsubon ku oinsanan bohogian i potuu siktor koporintaan toi swasta do tumilombus miuhup. Kanou tokou no moningkanan kumaa koburuon di poinpuli, ogirot om i mimpau do timpu dumontol, i kaanu monginsonong koposion nogi’ monuridong mogigiyon id pototongkop Sabah,” ka disio ontok minomupus Pokikitanan Hartanah Persatuan Pemaju Perumahan dan Hartanah Sabah (SHAREDA) PropEX 2025 do hiti di tadau baino’.
Dr. Joachim i po nogi’ Montiri Koporintaan Koiyonon om Pomuwalaian minoboros, piomungan ogirot pialatan harata’tana om ponombuluyan kopokito ‘prospek’ kosunion osonong montok Sabah.
Mintong di palan Tinimungan Kibing pinapaapu’ RM7.2 bilion montok popoburu’ loji pamansaian ‘kaca solar’ id Kimanis, minoboros isio, projik dilo’, nung koindalan, kaanu mongukab gisom 5,000 pakarajaan id tolu fasa. Iti id suai ko’ kopoindalanan di poinharo mantad komponi dilo’ id KKIP i noondo minamagaji lobi 1,600 rayat Sabah nogi’ popoudar kumaa pidagangan sompomogunan.
“Iti kopokito iso’ kinosimbanon osonong kumaa pomorunan kitiknologi akawas om ouli’ id pogun tokou,” ka disio.
Dr. Joachim minanahak boboroson.
Dr. Joachim nga’ minamarait ngoi’ kinoburuon agayo siktor harata’tana id Kota Kinabalu, miampai pipiro projik ‘mercu tanda’ mamaso poindalanon. Wookon dilo’ ‘The V by Jesselton’ id longkod kakadayan, ‘The Bedrock @ Jesselton Docklands’ id siriba’ palan ponondulian tisan rahat, ‘The Logg’ id Luyang i kopokito koiyonon gaya pamaamasi om ‘runcit’ otitimung, nogi’ ‘Boulevard 360 @ Bundusan’ doid Penampang.
“Projik ngaawi’ diti kopokito kotumbayaan ogirot mangangapu’ om kopokionuan di nokoinsawat kumaa koyuyuon koposion kakadayan di ‘dinamik’ om winonsoi miampai osonong,” ka disio i minoboros do waya’ siktor harata’tana nga’ noinggirotan di kinotungagon kawagu pomorunan ponombuluyan Sabah.
Id Kota Kinabalu, kinosuangon kawagu tutumombului sompomogunan om suang pogun nakatampasi kawagu pongindopuan, minongingkawas kotumbayaan nogi’ minongukab kosiwatan wagu. Naamot dilo’, Semporna masaan mamaramit kinosimbuaton ponombuluyan miampai pinongukaban ‘Wyndham Semporna Resort’ i pikikiro koposindak po do nindikohon dilo’ sabaagi ririkoton marin om pulou nointutunan.
“Soira’ do opongo, kosili ilo’ do resort kipungaran sompomogunan kumoiso’ id Semporna, potilombus dino kopo’iliu dilo’ kotopong di ririkoton agayo songkinoiyonon,” ka disio.
Minanangkabahayan nogi’ isio kumaa SHAREDA mantad kinopongonjuran PropEX 2025, i komoyon disio okon nopo ko’ pokikitanan harata’tana toomod nga nogi’ koiyonon pibarasan, piilangan nogi’ kopotontuan ‘visi’ montok koburuon timpu dumontol Sabah.
