Hajiji miampai dilo suai pinopokili bondira Sabah om Jalur Gemilang.
KOTA BELUD: Boyoon Montiri, Datuk Seri Haji Hajiji Haji Noor minambala’ totondos pembangkang do Gabungan Rakyat Sabah (GRS) nopo nga’ koporintaan nopiil (amu’ nakalantoi).
“Nung koporintaan GRS nopiil, tantu’ no do amu’ tokou kaanu manahak miagal dilo’ ginumu’ ponguhupan kumaa rayat, om amu’ kaanu pinopoingkawas asil pogun kuminaa lobi RM7 bilion nung piadangon di RM4 bilion no pogulu diti.
“Pembangkang komilo no do popotonu’ totondos om kopongudutan id media sosial. Koduo nopo, di maso diolo’ minomorinta’ solinaid duo toun sitanga’, aiso’ o palan diolo’, nga’ baino’ minggayo boros miagal-agal ko’ oilaan ngaawi,” ka disio.
Minoboros id Ababayan ‘Libat Urus Komuniti SMJ’ miampai Boyoon Montiri id Kampung Pantai Emas do hiti di tadau baino’, ka di Hajiji, pointonod minonowoli pomorintaan, koporintaan pogun GRS nokopoindalan kikiro 400 inggisaman id siriba’ palan koburuon Sondikoton Sabah Maju Jaya (SMJ) om soginumu’ 94 pihatus mantad dilo’ notulud no montok kasasanangan rayat om komogoton pogun.
Minoboros isio, koporintaan pgoun pinapabalanja’ RM1.49 bilion montok minanahak koundaran kumaa 336,076 mamaramit ponguhupan kotundunan mantad toun 2021 gisom 2024, kaampai Skim Ponguhupan Am (SBAM) om Skim Ponguhupan Anak Yatim (SBAY), o wookon.
Minoboros isio, ginumu’ nopo dilo’ noruhangan kuminaa RM385.5 riong i pinoobi’ toun diti montok kopoindalanan Ababayan Sentuhan Kasih Rakyat (SYUKUR), i minanahak koundaran kuminaa 100,000 mamaramit mantad tinimungan mosikino m mosikin ‘tegar’.
“Montok toun 2025, koporintaan pogun pinopoobi’ RM488.5 riong montok pinopoindalan mogisusuai kaparagatan monoibau komosikinan,” ka disio i minoboros do koporintaan pgoun minomoguno ‘Pangkalan Data Sabah’ toi PADANs montok minongilo ponguhupan di kosudong mimpau ‘profil’ Luguan Suang Walai (KIR).
Toun po nogi’ diti, ka disio, koporintaan pogun potilombus monokodung angkab koporintaan Pisompuruan kopiongoi di palan koburuon Sondikoton SMJ om Bajet Pogun Sabah 2025 id siriba’ ababayan koponoibahan komosikinan.
Suai dilo’, Boyoon Montiri minoboros koporintaan pogun nakapabalanja’ kikiro RM1.33 bilion montok koburuon ‘modal insan’ kosuul no id kaganaan balajaran.
“Iti amu’ insan powonsoiyo’ pogulu diti. Nakaanu tokou pinopoinsawat kopoobian sikulasip pogun kuminaa RM138 riong toun diti nung piadangon di RM50 riong no di pogulu diti,” ka disio.
Koporintaan pogun nga’ minanahak nogi’ koposuulan kumaa Ikonomi Obulou montok monuridong kopuawangon wagu nogi’ mogowit sumuang lobi kogumu’ asil montok Sabah, ka disio.
Minoboros isio laang nopo dilo’ nga’ pomoruhang kuminaa asil pomoruhang i naanu mantad siktor tumau om gas maya’ kinogompitan lobi kagayo pogun katalib nokogirot Pibatosan Piuhupan Komersial (CCA) miampai Petronas.
Hajiji nga’ minoboros nogi’ Warisan mimboros kaagal-agal do yolo’ minonimpuun Ababayan Surupukaraja’ Tana’ Mamasok Pogun Sabah (PANTAS), nanamot do otopot nopo nga’ alaid no o ababayan dilo’ do nokoindalan.
“Nuru’ ku pointalangon haal diti tu’ amu’ oku mimang do rayat id Kota Belud aakalan di pongungudut pembangkang,” ka disio.
Hajiji i po nogi’ Ponorikohon GRS minongunsub nogi’ mongungundi’ papatantu’ kalantaion piomungan dilo’ id koinsanai apat timpohon pogun id kinoiyonon dilo’.
Talib dilo’, i Hajiji tinanud di Luguan Mongungulud Sekretariat SMJ Datuk Datu Rosmadi Datu Sulai, ADUN Pintasan, Datuk Fairuz Renddan, ADUN Tempasuk Datuk Mohd Arsad Bistari, Presiden USNO Tan Sri Pandikar Amin Mulia om Luguan Gagasan Rakyat Usukan Datuk Japlin Akim, pinapatahak geran tana’ PANTAS kuminaa 10 mamaramit minongobi’ 502 i suai.
Boyoon Montiri pinapatahak nogi’ ponguhupan kotundunan, kunci Walai Mesra SMJ om ponguhupan kumaa 66 tinan sikul id watas diti maya’ Upis Balajaran Watas (PPD).
