Haji Hajiji Haji Noor
KOTA KINABALU: Boyoon Montiri, Datuk Seri Haji Hajiji Haji Noor minoboros, koporintaan pogun tumopot do papagaras kogorison ginoris karaja’ nokoiyonon pogun diti, kaampai id siktor waig kopiongoi di ‘visi’ dau kumaa Sabah di otunda’.
“Miampai mangaba’ tongo’ abaal tokou do toilaan om komilaan doun kaawagu, pagarason tokou yolo’ montok momuruan pomorunaan tiknologi om nubasanan wagu.
“Kopoopuan id ‘modal insan’ diti oponsol kopio montok koburuon po’ompus id koinsanai siktor,” ka disio ontok pinopoimagon Pitimungan om Ekspo Asiawater Sabah i nakapanau id Longkod Konvensyen Sompomogunan Sabah (SICC) do hiti di tadau baino’. Teks boboroson disio binasa’ di Monguhup Montiri kumaa Boyoon Montiri, Datuk Abidin Madingkir.
Boyoon Montiri minoboros, amu’ olimon do koundaran ikonomi mantad pomorunan waig om ‘kumbahan’ di ogirot nopo nga’ agayo tu’ surupukaraja’ waig di osonong koowit kumaa rontob kolidasan ginumuan di lobi kosonong ngoi’ koinsawaton nimbulayan.
“Soira’ tokou mangapu’ id kogogonopan waig, mongunsub tokou nogi’ do koponsupuan pakarajaan om kosunion ikonomi, potilombus dino papatantu’ oinsanan rayat sabah kaanu koundaran mantad kinomogoton diti,” ka di Hajiji.
Minoboros isio, pitimungan om ekspo nopo diti nga’ iso’ po timpu oponsol id inggisaman monoibau kobolingkahangan agayo i potoguang do Sabah.
“Otumbayaan oku po’ompus pipiro tadau diti, kohompit yokoyu id pibabarasan di kirati om mogihum panalasaian ‘inovatif’ montok monoibau kaantaban kopononsog i otoguang tokou id Sabah,” ka disio.
Kalansanan di Hajiji pibabarasan dilo’ kopongukab kosiwatan wagu montok miuhup om piilangan toilaan.
“I nopo oponsol nga’ papagaras kogorison om popoburu’ karalano’ kiwaya’ montok monginsonong surupukaraja’ waig kumaa mogigiyon tokou,” ka disio.
