KOTA BELUD: Kinotiu’on 13 puru Parti Bersatu Sabah (PBS) i otiu’ pointonod pinonuridongan parti dilo’ di 1985 rinamai id iso’ ramai toniba’ kopihondot kinopoimaganan Mitingan Agayo Raan om Kinopoimpuunan Pakakaraja’ Longkod Watas Mongundi (PDM) Tambulion id Pitimungan Tokou, Kampung Sorob.
Yolo’ i noilaan sabaagi puru bobos otiu’ maya’ kinoponorisidan di Puruankuasa’ PDM Tambulion minamaramit setifikit pongunsikohan om baju ‘T’ pinotomod i pinotunui di Luguan Bohogian PBS Kadamaian, Demis Rumanti.
Wookon di mamaramit pongunsikohan dilo’ nopo i Michael Tinggiu, Cowboy Mialah, Suganting Mandur, Micheal Anchol, Jubilit Paun, Raisah Latip, Sapilin Tunda, Sebiting (Rejim) Sentim, Pihoi Dusin, Tanggulung Manggom, Mariah Sunduan, Madusa Gundadar om i Butihal Gasatan.
Kumoduo Luguan Bohogian PBS Kadamaian, Walter Kandayon minoboros, pongunsikohan nopo diti nga’ ponokotanda’ pongokunan di gatang kinotiu’on i nosili lugu’ ginaras parti.
“Kinotiu’on diolo’ okon nopo ko’ poinhahali’ kumaa mamaramit nga nogi’ aset bobos kigatang om amu’ agatang montok PBS. Yolo’ nakawaya’ mogisusuai pogumbalan, katama’ mibi’-bibi’ obobog do lakun kopoburuan, okon ko’ momogusa’ somuli’ nga’ mononokodung ouli’ do parti,” ka disio.
Minoboros isio do kinotiu’on puru nopo nga’ haal oponsol id kotomposion pulitik sosonginan parti, naamot kinoponolikudan kagagut om kopomiraag poburuon i nowonsoi do solinaid.
Ka disio, puru otiu’ PBS pikikiro hinadapan noribu om iti no wookon sabab kopio PBS kakal ogirot poungkakat pointonod 1985, kaampai id kopoburuan kopotutan ngaawi’ rayat Sabah miagal poinsuang id Pibatosan Malaysia 1963 (MA63).
Songulun mantad mamaramit pongunsikohan, i Michael Tinggiu minoboros, isio om koombolutan di suai kakal id PBS pointonod tinuridong ilo’ tu’ otumbayaan di poburuon parti orukut tinaru dilo’ i ogirot mongobi’ kopotutan Sabah.
“Amu’ yahai insan sunsuri sundung do koporintaan PBS naatu’ di 1994 gama-gama’ kinoponolikudan pipiro mobi’ rayat i katama’ magada’ mandat rayat,” ka disio.
Ramai pongunsikohan diti nga’ okito nogi’ do kaanu mongimbulai sunduan osonong id nayatan puru parti, lolobi no montok mongunsub sunduan om manahak pongunsuban kumaa sukod wagu mooi do tumilombus miampai PBS id kopoburuan mongobi’ rayat om pogun Sabah.
Ka do manganganjur, ababayan miagal diti kalansanan aanu monilombus om poinggoyoon kumaa rontob lobi poinbida’ do timpu dumontol sabaagi wookon mantad ababayan mamagatang kinotiu’on om kolubukan puru parti.
