Haji Hajiji Haji Noor
KOTA KINABALU: Boyoon Montiri, Datuk Seri Haji Hajiji Haji Noor minokianu rayat do toririmo mamantang pisuayan montok monuridong iso’ timbagos pisompuruan di lobi kogirot.
Minoboros isio, kagos pisompuruan kosili lobi agaras om ogirot nung rayat tumilombus misompuru.
“Kohondot dilo’, pokionuon ku rayat do tumilombus miampai koporintaan sabaagi tambalut ponoki’ilang do papagaras pisompuruan om monimporon kaadangon pulitik montok kasasanangan rayat om koturunduson koburuon pogun di koupusan diti.
“Ramai Kaamatan i ramaion tikid toun ontok tulan Mikat (Kolimo) okon nopo ko’ kihontolon pogirot silaturahim om pisompuruan id naaytan rayat mogisuai tinaru om ugama’ nga nogi’ montok popokito kopurimanan mongunsikou mantad asil di osonong.
“Nga’ lobi mantad dilo’, Kaamatan nopo nga’ kopokitanan pihunungan om sunduan oulud id nayatan rayat Sabah, kopiongoi di angkab Malaysia MADANI i poposotol gatang kotulunan, sopipantang om kopogiagalan,” ka disio id pason kopihondot Pamaramaian Ramai Kaamatan 2025, do hiti, di tadau baino’.
Ki’ uhu do “Kaamatan Untuk Semua, Kaamatan For All, Kaamatan Montok Toinsanan’, ka di Hajiji, uhu diti koowit pason di aralom kopio om kopotonggoi ngaawi’.
“Uhu diti atalang kopokito do Ramai Kaamatan okon ko’ pasanganu nodi iso’ tinimungan, nga’ iso’ kararamaian oinsanan i kapaampai oinsanan rayat amu’ momuntuk tinaru, ugama’ om ningkakaton.
“Orohian oku mamasok kopisanangan mamaramai Ramai Kaamatan, Kotobian Tadau Tagazo Do Kaamatan kumaa oinsanan mogigiyon i mamaramai dilo’,” ka disio.
