Hajiji tinanud di Dr. Zaliha suminain plak id Ramai Kinopoimpuunan Jeti om Kinopohimaganan Surupukaraja’ Feri Kota Kinabalu-Labuan id Dodopiton Kota Kinabalu di tadau baino’.
KOTA KINABALU: Surupukaraja’ feri susumakai id pialatan Kota Kinabalu om Watas Pisompuruan Labuan do baino’ diti nokoguli’ nakapanau talib pipiro toun noundarangan, potilombus dino kopogirot piromutan padsakaian rahat om mongukab kawagu waya’an oponsol kumaa kapapanaho’ rayat nogi’ koburuon ikonomi padarapas watas.
Boyoon Montiri, Datuk Seri Haji Hajiji Haji Noor minoboros, kinopoindalanan kawagu wawaya’an diti okon i ko’ iso’ laang ‘logistik’, nga nogi’ kointalangan atalang kopusohon koporintaan kumaa kotundunan rayat id Sabah om Labuan.
“Surupukaraja’ diti oponsol kopio kumaa rayat. Okon opo ko’ sabaagi waya’an piromutan, nga koporomut id paganakan, balajaran, ponombuluyan om pongindopuan i haro solinaid diti,” ka disio id Ramai Kinopoimpuunan Jeti om Kinopohimaganan Feri Susumakai Kota Kinabalu-Labuan id Dodopiton Kota Kinablau di tadau baino’.
Hajiji minomutul riben id Ramai Kinopoimpuunan Jeti om Kinopohimaganan Surupukaraja’ Feri Kota Kinabalu-Labuan id Dodopiton Kota Kinabalu di tadau baino’.
Boyoon Montiri minoboros, kinakasahan surupukaraja’ i naantakan pogulu diti mantad no pipiro haal miagal do koyuon jeti i amu’ oumolig, kinapamagayatan subsidi tumau kumaa mongungusaha’ nogi’ waya’ tomporuruol Covid-19, i nakakasou kinosolioputon kapapanaho’ rayat.
Ka disio, sabaagi laang panalasaian osikap, terminal feri pinoundaliu mantad Jesselton Point kuminaa Dodopiton Kota Kinabalu, miampai koponguludan kopoindalanan do noondo papanahon poinponu’ do bohogian Dodopiton Kota Kinabalu.
“Projik diti nga’ nakaramit kopoobian RM1.3 riong mantad Komontirian Watas Pisompuruan montok karaja’ ngaawi’ ponginsonongan.
“Orohian oku mongunsikou kumaa koinsanai kotinanan di poinhompit kaampai Upis Haal Suang Pogun om Ponolidikan (PHEDNP), Kotinanan Dodopiton-Dodopiton Sabah (LPPS), Komontirian Karaja’ Agayo, Komontirian Watas Pisompuruan om Tinimungan Suria i minogiuhup pinapalantoi inggisaman diti,” ka disio.
Hajiji minooi intong koiyonon jeti katalib pinopowonsoi Kinopoimpuunan Jeti om Kinopohimaganan Surupukaraja’ Feri Kota Kinabalu-Labuan id Dodopiton Kota Kinabalu di tadau baino’.
Hajiji minoboros, surupukaraja’ feri diti pikikiro kapanahak waya’ osonong kumaa siktor ponombuluyan pogun, lolobi no dumontol Toun Monombului Sabah 2026.
“Ilo’ po nogi’ nga’ kopongukab kosiwatan wagu id kaganaan pidagangan om kopoopuan pialatan Sabah om Labuan,” ka disio.
Pinosotol disio do piromutan id pialatan Sabah om Labuan okon i ko’ id sunduk ‘geografi’ nopo, nga’ kapaampai nogi’ do susuyan kahandamna, koubasanan om piromutan sosial di poinralom, nokoposili wawaya’an diti oponsol kopio kumaa rayat id goduduo kinoiyonon.
Ka disio, ogumu’ rayat Sabah poingkaraja’ om mongingiyon id Labuan, om ingkaa nogi’ poinsulak. Kohondot dilo’, kinopongoputan kawagu wawaya’an diti kirati kopio kumaa ogumu’ bohogian.
Minoboros isio, miampai kinopoindalanan kawagu surupukaraja’ diti, rayat do babaino’ kiharo lobi kogumu’ sumpili’ padsakaian – i potuu momoguno waya’an tawan, ralan tindal kumaa Menumbok toi mitilombus maya’ feri ekspres mantad Kota Kinabalu kumaa Labuan miagal pogulu diti.
Hajiji tuminabi’ dilo’ susumakai feri id Ramai Kinopoimpuunan Jeti om Kinopohimaganan Surupukaraja’ Feri Kota Kinabalu-Labuan id Dodopiton Kota Kinabalu di tadau baino’.
Ka di Hajiji, kinopoimpunaan diti koponokotanda’ kotimpuunon kumaa iso’ palan karaja’ padsakaian rahat di lobi kogirot, opulokis om po’ompus, kopiongoi di angkab pogun montok poposodia’ kogogonopan osuau rayat om osuau sandad kumaa sinakagon dumontol.
Minanahak isio jominan do koporintaan pogun pointopot papatantu’ aiso’ rayat di oiduanan gama-gama’ kohimpogongan logistik, om koburuon kogogonopan maan tilombuso’ papanau montok koburuon koinsanai.
“Kalansanan do jeti om surupukaraja’ feri diti kosili jambatan i koporomut okon nopo ko’ watas, nga nogi’ silaturahim, kosiwatan ikonomi om angkab timpu dumontol rayat,” ka disio.
Nokotindapou nogi’, Montiri id Koupisan Luguan Montiri (Watas Pisompuruan) Datuk Seri Dr. Zaliha Mustafa; Montiri Karaja Agayo Sabah, Datuk Ir. Shahelmey Yahya om Senator Tan Sri Anifah Aman nogi’ lansanon di suai.
