Dr. Joachim (kolimo, wanan) pinapatahak tandamato kuminaa di Tun Musa id kinotombuluyan dilo’.
KOTA KINABALU: Turu’ ababayan nulud kopihondot Kapamaramaian Kinouliton Toun Kinosusuon Pinotomod ko-74 Molohingon Agayo Pogun (TYT) Sabah, Tun Musa Aman mimpuun ko 14tw diti.
Kumoduo Boyoon Montiri II, Datuk Seri Dr. Joachim Gunsalam po nogi’ Ponorikohon Puruankuasa’ Ponokotulu pamaramaian minoboros, tongo’ abayan poinhompit noulud montok monuang kopomoromitan ramai dilo’.
Dr. Joachim ontok rinubaan media.
“Toun diti haro turu’ no ababayan i tikid toun do poindalanon.
“I kumoiso’ tantu’ no do ko 14tw Koonom papaharo ababayan monginum teh miampai di tangaanak pinotomod.
“Talib dilo’ ontok ko 15tw Koonom, papaharo tokou do tadau Etnik Sabah. Ilo’ pogi’ do otumbayaan tokou di Tun sabaagi TYT isio no dolundung do oinsanan rayat Sabah mantad dilo’ ilo’ no nopo montok mongunsikou oinsanan rayat id Sabah.
“Talib dilo’, do ko 19tw Koonom haro o tahlil tokou, doa selamat om miagal noubasanan do ko 21tw Koonom papaharo tokou do istiadat pinghuyudan, Ramai Istiadat Kapamaga’an Darjah-Darjah Kagayaan om Bintang-Bintang nogi’ Midol Kagayaan Sabah om Ramai Moginakan Pogun do doungotuong,” ka disio kumaa media katalib pinapaharo kotombuluyan apantang kumaa di Tun Musa id Istana Seri Kinabalu, di tadau baino’.
Ka disio, Pamaramaian Tadau Etnik Sabah i pinoulud koindalan id Longkod Konvensyen Sompomogunan Sabah (SICC) pikikiro kopotimung somok oinsanan tinaru id pogun dilo’ i mongiikiro korikotan lobi 1,000 tombului.
Nokotindapou nogi’, Monguhup Montiri Komontirian Koporintaan Koiyonon om Pomuwalaian, Datuk Isnin Aliasnih; Monunurat Pointatap Komontirian, Datuk Dr. Jamili Nais; Mayor Kakadayan Agayo Kota Kinabalu, Datuk Seri Sabin Samitah; Potunud Koupisan Haal Ugama’ Islam Pogun Sabah, Datuk Jumain Abdul Ghani.
