Hajiji om i Juliah guminambar miampai wookon mooi haji watas Tuaran id ababayan pinirubaan dilo’.
TUARAN: Boyoon Montiri, Datuk Seri Haji Hajijij Haji Noor om sawo, Datin Seri Hajah Juliah Salag pinoposiwat timpu minooi ponongkirumo miampai tinimungan haji mantad watas Tuaran id iso’ ababayan toniba’ nga’ noponu’ rati id kinoiyonon disio doid Kampung Serusup, do hiti, di tadau baino’.
Ababayan pinirubaan dilo’ pinaharo montok mongunsikou om manahak boros pongunsub kumaa di 31 tombului Allah pogulu diolo’ poungkoyutan popoindalan ibadah haji doid Tana’ Tobitua.
Hajiji pinopolombus doa om kalansanan mooi oinsanan jemaah onuan koturunduson id pamanahan, kolidasan di osonong om kaanu haji di ‘mabrur’ (ogonop).
“Sambayang ku mooi oinsanan oinsanangan om oumolig paangayan om oumolig poulian,” ka disio.
Isio om sawo pinapatahak nogi’ do toluod kumaa tongo’ puru haji om pakakaraja’ Tabung Haji nogi’ suminiwat do monongkirumo miampai diolo’.
Koyuon do ababayan dilo’ nokosindak po nogi’ miampai bacaan doa ‘selamat’ nogi’ minangaangakan.
Nokotindapou nogi’ i Potunud Eksekutif Operasi, Kotinanan Tabung Haji, Haji Mohamed Ameen Abdul Wahab; Potunud Watas Sabah om Sarawak Kotinanan Tabung Haji, Datuk Hajah Nurlaila Haji Said; Potunud Koupisan Komogoton Islam Malaysia, Raan Sabah, Datuk Haji Norjeli Haji Dais om Potunud Pogun Sabah, Kotinanan Tabung Haji, Haji Yusdi Haji Nasip.
