Hajiji pinoposuang parai di noomot id Lingkut ponokotanda’ kinopoimaganan Ramai Kaamatan 2025.
TAMBUNAN: Enakmen Kuut Mamasok Pogun Sabah 1992 alanan di ‘versi’ kaawagu montok mongulud kawagu ‘struktur’ (nuludan) Kuut Mamasok Pogun nogi’ papagaras kotinanan dilo’, ka di Boyoon Montiri, Datuk Seri Haji Hajiji Haji Noor.
“Iti no i masaan tokou do inggisaman montok papatantu’ Kuut Mamasok Pogun (MAN) lobi kiwaya’ om kosudong,” ka disio.
Hajiji minoboros, Kounsol Haal Mamamasok Pogun Sabah pinoposodia’ draf enakmen wagu dilo’, ilo nopo Enakmen Kuut Mamasok Pogun Sabah 2025, i masaan sorisidon kopio do Komontirian Koporintaan Koiyonon om Pomuwalaian.
“Draf diti momoguno ‘input’ mantad Koupisan Luyar Agayo Pogun, Koupisan Surupukaraja’ Koporintaan Pogun om Komontirian Kousinan pogulu pawaladon kumaa Nuludan Montiri Pogun om potilombus dino kumaa Lintuhun Undangan Pogun (DUN),” ka disio.
“Ilo’ nopo wookon mantad di mogisusuai inggisaman i masaan onuon do koporintaan pogun montok manahak koundaran kumaa rayat id nayatan siriba’,” ka disio ontok pinopoimagon Ramai Kaamatan 2025 id Lintuhun Pisompuruan do hiti di tadau Kolimo katatalib.
Hajiji sinuau ontok kinorikotan doid Lintuhun Poingukab Pisompuruan Tambunan.
Boyoon Montiri minoboros, koporintaan pogun maya’ Komontirian Pomutanaman, Ponginsadaan om Pomorunan Akanon (MAFFI) pointootopot do mongingkawas Rontob Kosukupan Tinan (SSL) asil pomutanaman montok monginggirot ‘sekuriti’ (koumoligan) takanon id Sabah.
Noondo diti, SSL Sabah id rontob no do 22.8 pihatus om pogun diti kakal tumalahan kumaa takanon udaron, ka diiso.
Kohondot dilo’, ka id Hajiji koporintaan pogun minaganu kootusan montok mamasi kawagu Kotinanan Parai om Wagas Sabah (LPBS) toun di nakatalib om babaino’ diti masaan popoburu’ kikiro 22,146 hektar ranahon nokologos id watas Tuaran, Kota Belud, Kota Marudu, Keningau, Papar om Tambunan.
“Inggisaman diti tantu’ no do kouhup MAFFI monigampot rikoton SSL takanon Sabah sokukuri’ 30 pihatus dumontol toun 2026 om 60 pihatus dumontol toun 2030,” ka disio kawagu.
Minongomi karait Ababayan ‘Revolusi Ekonomi Pertanian Luar Bandar’ (REPLB) i pinoimpuun di tadau Kotolu (ko 30tw Kaapat), ka di Boyoon Montiri kopiongoi ilo’ di sunduan Ramai Kaamatan i kopokito kopusohon koporintaan pogun kumaa tinimungan kinindopuan osiriba’, lolobi no tulun tongomosikin om adalaan mosikin id koiyonon labus kakadayan.
Ababayan diti pinoimpuun sabaagi laang kosudong montok mongingkawas kopolobusan pomutanaman do papasarok kosunion ikonomi momumutanom kosukupan sondiri.
“Ilo’ okon nopo ko’ kituduan mongingkawas asil pomutanaman om sekuriti takanon id Sabah do poinsuul om pompuli do Malaysia nopo, nga nogi’ mongingkawas rontob ikonomi mogigiyon labus kakadayan, papagaras momumutanom, monginsada’ om ‘agropreneuer’ mooi do kaanu yolo’ mimpoopori, ki’inovasi om kaanu nindopuan do poinggirot.
“Maya’ pomogunaan tiknologi kaawagu, sistem sokodung piromutan pangaba’ om pongukaban kosiwatan pidagangan wagu, ababayan diti mongukab ralan kumaa mogigiyon labus kakadayan do mingkakat sabaagi papamanau agayo id ikonomi Sabah,” ka disio.
Lobi po koponsol, ka di Hajiji koburuon ikonomi labus kakadayan nga’ kosili posunduran kumaa pisompuruan om kaadangon sosial.
“Soira’ koingkawas nindopuan, kosiwatan pakarajaan koimbulai om sukod wagu gumuli’ kumaa kampung miampai toilalaan om iman-imanon, mogigiyon nga’ kosili lobi ogirot, misompuru om koburu’. Kalansanan ku ababayan diti kouhup tinimungan momutanom, loolobi no id labus kakadayan,” ka disio.
Hajiji om Kumoduo Boyoon Montiri I po nogi’ Montiri Pomutanaman, Ponginsadaan om Pomorunan Akanon, Dautk Seri Dr. Jeffrey Kitingan, pinopoimpuun banner ‘Revolusi Ekonomi Pertanian Luar Bandar’.
Boyoon Montiri minoboros, pamaramaian Ramai Kaamatan nopo nga’ wookon ababayan oponsol montok rayat Sabah i okon nopo ko’ kituduan pogirot piromutan om pisompuruan id nayatan mogigiyon orukut tinaru om ugama, nga sabaagi tanda’ kopongunsikohan mantad asil noomot di osonong.
“Lobi ko mantad dilo’, Kaamatan kopokito piuludan om sunduan oulud rayat Sabah, kopiongoi di angkab Malaysia Madani i poposotol do gatang kotulunan, mogipapantang om kopogiagalan,” ka disio.
Boyoon Montiri minoboros, uhu Ramai Kaamatan toun diti – Kaamatan Montok Toinsanan (Kaamatan For All, Kaamatan Untuk Semua) – koowit pason di oponsol om poinpuli.
“Koposotol ilo’ do Ramai Kaamatan okon ko’ pasanganu iso’ tinimungan nopo, nga’ karamaian oinsanan i kopohompit oinsanan rayat amu’ momuntuk tinaru, ugama’ om nantadon.
“Kaamatan okon nodii ko’ karamaian kinoomotan nopo. Nosili ilo’ do kokitanan pisompuruan rayat, kosiwatan tokou do mogi’intutun-tutun om mamantang nogi’ mamaramit kinolumison koubasanan sompoopori.
“Uhu diti nga kopokito nogi’ do tonggungan koporintaan pogun monotk monompuru rayat Sabah mantad oinsanna nayatan montok mamaramai tungkusan koubasanan tokou i opuawang om mogisusuai,” ka disio.
