Dr. Joachim (tanga’) guminambar miampai tombului tapantang om mamaramit Gaa’ Surupukaraja’ Cemerlang, JHEANS.
KOTA KINABALU: Koupisan Haal Mamasok Pogun Sabah (JHEANS) nakalantoi pinopoindalan mogisusuai kinoponginwoguan kopoindalanan om ponginsanangan surupukaraja’ kumaa lobi kiwaya’, opulokis om osuau rayat, ka di Kumoduo Boyoon Montiri po nogi’ Montiri Koporintaan Koiyonon om Pomuwalaian Sabah, Datuk Seri Dr. Joachim Gunsalam.
Minoboros isio, kinalantaion dilo’ kaampai pomogunaan tiknologi ICT, ponguludan kawagu sistem kopoindalanan adat id Kuut Mamasok Pogun nogi’ pongingkawasan kabaahon id kapatahakan surupukaraja’.
“Mamaramit oku poinsonong di koinsanai inggisaman ponginwoguan diti i atalang kopokito JHEANS, mamaso id waya’an di kohunung id kapagarasan kotinanan tadat id pogun diti,” ka disio ontok pinopoimagon Ramai Gaa’ Surupukaraja’ Cemerlang (APC) JHEANS 2024 id Hotel Le Meridian, Kota Kinabalu, di totuong tadau Kaapat (ko 30tw Kaapat).
Minonongkounsikou nogi’ isio kumaa tonggungan om sunduan karaja’ akawas di puru koupisan dilo’ id kopotontuan kotilombuson tonggungan JHEANS montok kasasanangan rayat Sabah.
Dr. Joachim (koduo, wanan) minamaramit tandamato mantad di Haji Nordin.
Dr. Joachim minoboros, kukumaraja koporintaan okon ko’ montok nopo popoindalan katatapan, nga nosili piromutan oponsol id pialatan koporintaan om rayat, kohondot idlo’ naangayan surupukaraja’ koporintaan kiguno toririmo inggarasan.
Ka disio, gaa’ di pinatahak tadau dilo’ okon nopo ko’ mongunsikou naangayan sosongulun, nga nosili intodonon pongunsuban kumaa tambalut iso karaja’ di suai montok tumilombus papathaak karaja’ miampai poinponu’ ginawo om tinonggungan.
“Kalansanan ku oinsanan puru JHEANS kaanu momuginawo sunduan ‘Berbakti dengan ikhlas, bekerja dengan amanah’ id koponguhupan kumaa ninggisaman koporintaan pogun,” ka disio.
Dr. Joachim pinopolombus nogi’ kotumbayaan do JHEANS kaanu papagaras kopogirotankuasa’an Undang-Undang Adat id Sabah nogi’ kosili posunduran kumaa kopomogompian tungkusan adat id pogun diti.
Ka disio, koupisan dilo’ kiguno tumilombus popoluhub nubasanan karaja’ osonong nogi’ momuruan mimpau onom sondihon Malaysia MADANI ilo nopo nga’ kogiroton, kasasangan, ‘daya cipta’, mamantang, kotumbayaan om kolisihan.
Dr. Joachim (poindikau, tanga’), Isnin (kotolu, gibang), Haji Nordin (koduo, gibang) guminambar pongingitanan miampai tombului i nokotindapou om sitaf JHEANS.
Id ababayan dilo’, pinapahabar nogi’ isio ponguhupan pinotomod kousinan RM1,000 kumaa 3,983 Luguan Adat id pototongkop pogun i patahakon pogulu pamaramaian Ramai Kaamatan toun diti.
“Ponguhupan nopo diti tanda’ pongunsikohan kumaa karaja’ om kinouhupan tongo’ Luguan Adat id kopomogompian piuludan mogigiyon om monginggirot Kuut Mamasok Pogun (MAN) id siriba’ dolundung koporintaan pogun,” ka disio.
Minanangkabayahan isio kumaa oinsanan mamaramit gaa om lumansan naangayan i rinamai do tadau dilo’ kosili posunduran sunduan montok tumilombus patahak surupukaraja’ lobi kosonong do timpu dumontol.
Dr. Joachim minaganu nogi kosiwatan minamason Kotobian Mamaramai Tadau Kaamatan kumaa oinsanan i nokotindapou.
Nokotindapou nogi’ i Monguhup Montiri KKTP, Datuk Isnin Aliasnih; Kumoduo Monunurat Pointatap II, Faridah Giau; Potunud Koupisan Haal Mamasok Pogun Sabah, Haji Nordin Lossin; Upisor Watas Kunak, Majaran Osman; om i mantad Potunud JHEANS om Kumoduo Potunud (Pentadbiran), Noraisah Saiman.
