Raisin ontok kapahabaran kopihondot poporisaan SPM 2024 id SMK Mat Salleh, Ranau di tadau baino’.
RANAU: Soginumu’ 39,548 tulun calun minindikau poporisaan Setifikit Balajaran Malasia (SPM) 204 id Sabah minimpuun di tadau baino’.
Tumanud Utusan Malaysia, Potunud Balajaran Pogun, Datuk Raisin Saidin minoboros, mantad ginumu’ dilo’ 35,232 tulun calun sikul Komontirian Balajaran Malaysia (KPM), 472 tulun calun sikul id siriba’ agensi koporintaan, 234 tulun calun Sikul Mananga’ Ugama’ Pogun (SMAN).
Minoboros isio, soginumu’ 3,378 tulun kukumaraja’ pinoiyon id 313 longkod poporisaan id pototongkop Sabah.
Ka disio, Koupisan Balajaran Pogun (JPN) Sabah nga’ sumosodia’ nogi’ di karalano’ om laang posodiaan id koponoguangan nunu-nunu kopikikiraan kaampai timpu liyud po’ompus poindalan poporisaan sPM 2pm 2024.
“Kohondot dilo’, calun pinokianu popoilo do bohogian sikul toi JPN Sabah miampai osisikap nung amu’ no kotingan id longkod poporisaan di pinatantu’ toi nombo-nombo longkod poporisaan dodoros gama-gama’ no do kadaaton.
“Calun nga’ kasaga’ nogi’ momoromut numbur pisuk karaja’ poporisaan i pinosodia’ id Longkod Upis JPN Sabah,” ka disio id kapahabaran doid Sikul Mananga’ Kabansaan (SMK) Mat Salleh, do hiti di tadau baino’.
Ka disio, JPN Sabah toririmo tumopot do popowonsoi di bobos osonong montok papatantu’ poporisaan SPM 2024 aanu popoindalan miampai oturundus om oulud.
Pinointalang disio, JPN Sabah pinoposorou nogi’ koinsanai calun poporisaan SPM do mintong di ‘jadual waktu’ poporisaan montok maganu kointalangan karait tadau, kod om karatas poporisaan, nogi’ ponuhuan i kiguno tonudon po’ompus poindalan poporisaan.
Poporisaan kisurat SPM 2024 nokotimpuun pinoindalan di tadau baino’ gisom ko 6tw Koduo 2025.
