Koyuon songinan mantad padsakaian i nokohompit id kinoligaganan dilo’. – Gambar Bomba
TUARAN: Songulun napatai om duo i suai nosinduolan id iso’ kinoligaganan talun-alun nakapaampai duo tinan padsakaian ponit Proton Saga om Perodua Alza id Kampung Indai, do hiti, di kosuabon baino’.
Tumanud Longkod Kapapanahan Karaja’ Koupisan Bomba om Manampasi Malaysia (JBPM) Pogun Sabah, pamalahawan agagou naramit di jaam ko 7.39 kosuabon om tinimungan bomba matad Balai Bomba om Manampasi (BBP) Tuaran i binuruan di Komander Operasi, PBK II KUP Dendrel Juati nokorikot id kinoiyonon di jaam ko 7.50 kosuabon i kisinodu’ 11 kilometer mantad balai bomba.
Kinoligaganan diti nakapaampai tolu tulun nohompitan, kaampai songulun nohompitan kusai kiumur 24 toun i nokoidu’ pogun id kinoiyonon kinaantakan soira’ notobpus mantad padsakaian.
Duo kawagu nohompitan nosinduolan; songulun kusai kiumur 41 toun nosinduolan agaan, naamot songulun akwagu nohompitan i amu’ po notutunan nouruan nosinduolan.
Tinimungan bomba nakaanu pinapalabus duo nogompitan i naansip id suang padsakaian. Nohompitan di nosinduolan pinatahak kumaa bohogian Komontirian Kolidasan Malaysia (KKM) montok pongusapan potilombus, naamot nohompitan di nokoidu’ pogun pinatahak kumaa Pulis Diraja Malaysia (PDRM) montok ponoriukan.
Karaja’ kapanamangan koumoligan id kinoiyonon kinaantakan montok papatantu’ aiso’ koligogonon suai pogulu pinupusan karaja’ di jaam ko 9.15 kosuabon.
Karaja’ diti nakapaampai siam puru mantad BBP Tuaran i minomoguno songinan padsakaian FRT om songinan EMRS.
Karaja’ dilo’ nuhupan nogi’ di tolu puru mantad KKM om tolu puru PDRM.
