KOTA KINABALU: Molohingon Agayo Pogun (TYT) Pogun Sabah di kosisili, Tun Musa Aman, nokorikot id Terminal 2, Sosondoton Kapal Sompomogunan Kota Kinabalu (KKIA) pitanga’adau di baino’.
Kapal pinotomod i minogowit di Tun Musa suminondot di kikiro jaam ko 12 pitanga’adau, sinuau di kikiro 3,500 mononokodung i ruminubpu’ minonuau kinorikotan disio.
Tun Musa miampai pohimagon minamaramit watikah kinoposilihan mantad di Ke Bawah Duli Yang Maha Mulia Yang di-Pertuan Agong, Sultan Ibrahim, id iso’ ababayan i pinapanau doid Istana Negara, Putrajaya, konihab.
Kopupusai Istiadat Kinapatahakan Surat Cara Kinoposilihan, Tun Musa minamaramit nogi’ darjah pamantangan Seri Maharaja Mangku Negara (S.M.N) i koowit gaa’ ‘Tun’.
Nosusu di ko 30tw Kotolu 1951 id Beaufort, lansanon kiumur 73 toun diti pasanganu Ijazah Sarjana Pentadbiran Perniagaan mantad Univositi Edith Cowan, Australia. Nokoumbal isio tuminorina’ sabaagi Puru Lintuhun Undangan Pogun (ADUN) Sibuga solinaid onom penggal (1994-2020) om minongigit pipiro karaja’ oponsol, kaampai Montiri Kousinan Sabah, Montiri id Koupisan Boyoon Montiri om Konsul Apantang Malaysia kumaa Bangladesh.
Tun Musa nopo nga’ Boyoon Montiri Sabah ko-14, minongigit karaja’ dilo’ minimpuun di ko 27tw Kotolu 2003 do solinaid limo penggal otuntud gisom di ko 12tw Kolimo 2018, nosili Boyoon Montiri bobos alaid minongigit karaja’ id susuyan Kahandaman Sabah. Kinouhupan disio id pomorintaan om kopomuruanan nakaramit kopongokunan di poinpuli.
Timpu surupukaraja’ di Tun Musa sabaagi Momuruan Pogun Sabah ko-11 kotimpuun miampai pohimagon do ko 1tw Koiso’ 2025 om opupusan do ko 31tw Kohopod om Duo 2028. Minongolon isio di Tun Juhar Mahiruddin, i timpu surupukaraja’ disio opupusan do ko 31tw Kohopod om Duo 2024.
