Dr. Joachim Gunsalam
KOTA KINABALU: Koporintaan Pogun popoindalan kooturan wagu 30 pihatus kuota mamasok id siktor pomuwalaian swasta mimpuun tadau Minggu diti (1tw Kohopod om Duo).
Kumoduo Boyoon Montiri II po nogi’ Montiri Koporintaan Koiyonon om Pomuwalaian, Datuk Seri Dr. Joachim Gunsalam minoboros, montok papatantu’ kooturan 30 pihatus kuota mamasok diti kapanahak koundaran agayo kumaa momomoli ki’oitan mamasok, koporintaan pogun minonginsonong kooturan dilo’.
Ka disio, pinonginsonongan dilo’ winonsoi miampai minomonsoi pipiro ponimbanan di kosudong miagal id siriba’:
- 30 pihatus kuota mamasok nopo pinotilombus hinombo monunuridong pomuwalaian swasta mositi’ no do papatantu’ 30 pihatus mantad ginumu’ unit walai di waalon nopo poobion kumaa momomoli ki’oitan mamasok miampai kopotutan montok momili’ lot walai. Iti kirati momomoli ki’oitan mamasok nopo kikopotutan do momili lot walai di korohian diolo’ om monunuridong amu’ nodii pasagaon do papatantu’ lot walai montok padagangon kumaa momomoli ki’oitan mamasok miagal di pogulu diti.
- Montok papasanang pitorinaan hartanah id nayatan momomoli ki’oitan mamasok, mimpuun mantad tadau kopogirotan kuasaan kooturan wagu diti, kopogoduhan papadagang kawagu lot walai pasanganu momomoli ki’oitan mamasok i piogirot kuasa pogulu diti minaan iduo’. Mantad dilo’ momomoli ki’oitan mamasok kasaga’ papadagang kawagu walai di pinoobi’ mantad kuota 30 pihatus mamsok kumaa nombo-nombo momomoli miampai aiso’ kopogoduhan. Montok lot walai pasanganu momomoli ki’oitan mamasok i nopolobusan garan tana’ i kisuang kapantalaban toi kopogoduhan papadagang kawagu pogulu tadau poinggirot kuasa kooturan wagu diti, sanganu garan walai kaanu popotoguang upalai kumaa Koupisan Tana’ om Monunukat (JTU) montok momisok kapantalaban toi kopogoduhan dilo’ tumanud SOP JTU; om
- Nunu-nunu diskaun toi rebat di patahakon do monunuridong kumaa momomoli okon mamasok mositi’ no do ruhangan kumaa diskaun 5 pihatus poinharo mantad i pinatahak kumaa momomoli ki’oitan mamasok. Iti kirati nung momomoli okon mamasok kaanu 15 pihatus diskaun toi rebat, nga’ monunuridong pomuwalaian swasta dilo’ mositi’ papatantu’ momomoli ki’oitan mamasok aanu diskaun soginumu’ 20 pihatus.
Dr. Joachim minoboros, kooturan wagu diti nopo kopiongoi di inggisaman koporintaan pogun montok mongingkuri’ ‘birokrasi’ id pitorinaan pidagangan boli lot walai di tinimungan mamasok.
“Koporintaan nga’ otumbayaan nogi’ do miampai kooturan wagu diti, lot walai pasanganu tinimungan mamasok kosigampot koingkawason gatang pidagangan i mitopong di lot walai i pasanganu tinimungan okon mamasok,” ka disio id kointalangan di tadau baino’.
