Hajiji minonorikohon Mitingan Puru Kounsol Akawas GRS.
KOTA KINABALU: Boyoon Montiri, Datuk Seri Haji Hajiji Haji Noor i po nogi’ Ponorikohon Gabungan Rakyat Sabah (GRS) minonorikohon Mitingan Puru Kounsol Akawas (AMT) GRS doid Longkod Konvensyen Sompomogunan Sabah (SICC) do hiti di tadau baino’.
Mitingan dilo’ notindapou di tongo’ Monguhup Ponorikohon GRS i po nogi’ tongo’ Presiden parti komponen piomungan dilo’ yolo’ nopo, Datuk Seri Dr. Jeffrey Kitingan (Parti Solidariti Tanah Airku – STARSABAH); Datuk Seri Dr. Joachim Gunsalam (Parti Bersatu Sabah – PBS); Tan Sri Pandikar Amin Haji Mulia (Kotinanan Kabansaan Sabah Bersatu – USNO) om i Datuk Seri Yong Teck Lee (Parti Maju Sabah – SAPP).
Tongo’ Timbang Ponorikohon di nokotidapou kapaampai dii Brig. Jen. (B) Tan Sri Datuk Liew Yun Fah i po nogi’ Presiden Parti Harapan Rakyat Sabah (Harapan Rakyat) om i Datuk Chin Su Pin po nogi’ Presiden Parti Liberal Demokratik (LDP).
Nokotindapou nogi’ i Luguan Koonduan GRS, Datuk Seri Azizah Mohd. Dun; Luguan Komulakan GRS, Datuk Jonnybone J. Kurum; Monunurat, Datuk Seri Masidi Manjun; Monobubut, Ardino Diris; Luguan Kopointalangan, Datuk Joniston Bangkuai om tongo’ AMT ngaawi’ di suai.
Wookon i pinogibabarasan id mitingan dilo’ kaampai no ponuridongan Kukumaraja’ Pomilian Agayo Longkod (Pogun) om ponuridangan Puruankuasa’ Ponguludan Pomilian Agayo.
Parti komponen GRS kapaampai do Parti Gagasan Rakyat (Gagasan Rakyat), SAPP, PBS, STAR, USNO, Harapan Sabah, LDP om Parti Cinta Sabah (PCS).
