Tinan tondu’ di napatai noulakan korita api doros Kampung Petagas, Putatan di tadau baino’.- Gambar Bomba
PUTATAN: Songulun tondu’ napatai naamot tanak kusai dau awagat kinosinduolan soira’ notohuban korita api di maso suminoborong wawayaán korita api doros Kampung Petagas, do hiti di tadau baino’.
Tumanud Utusan Malaysia, id kinaantakan kikiro jaam ko 2 talib tangaádau dilo’, goduduo nohompitan masaan sumoborong wawayaán dilo’ pogulu notohuban korita api i id pamanahan mantad Putatan kumaa Kota Kinabalu.
Luguan Balai Bomba om Monumpasi (BBP) Putatan, Noorsherriyana Bohari minoboros, boogian dau nakaramit pamalahawan agagou kokomoi kinaangakan dilo’ di jaam ko 1.58 sodopon om sontinimungan turu’upisor om puru pinogusa’ kuminaa kinoiyonon kinaantakan.
“I nohompitan songulun tondu’ kiumur 41 toun om tanak-anak kusai 11 toun. Tondu’ dilo’ pinoimagon do nokoidu’ pogun id kinoiyonon kinaantakan, naamot tanak kusai dau nadalaan nosindualan kaampai noputut ponong gakod. Tanak-anak dilo’ nowit kuminaa Hospital Queen Elizabeth suminakai ambulans Komontirian Kolidasan,”ka disio id iso’ kointalangan di tadau baino.
Tinan di nohompitan tondu’ pinatahak kumaa bohogian PDRM montok laang potilombus.
