James Ratib
KOTA KINABALU: Koupisan Surupukaraja’ Kotundunan Am Sabah (JPKA) nokoposurat soginumu’21,504 mamaramit Skim Ponguhupan Am (SBAM) miampai ginumu’ pabalanjaan soginumu’ RM4,719,740 id pogun diti gisom di wulan Kohopod om Iso’ 2024.
Montiri Koburuon Mogigiyon om Kasasanangan Rayat, Datuk James Ratib minoboros, mantad ginmu’ dilo’, 732 tulun mamaramit nopo nga’ kitoruol luluso.
“Gisom wulan nakatalib, Sabah nokoposurat 2,182 susumakit naraag luluso rontob koompokon (ESRF) hinombo mantad ginumu’diti, 1,385 susumakit mindalan pongusapan hemodialisis naamot 797 susumakit mindalan pongusapan dialisis peritnoeal ambulatori po’ompus (CAPD),” ka disio id pitimungan Lintuhun Undangan Pogun (DUN) Sabah di tadau baino’.
Minonimbar isio ponguhotan di Dumi Pg. Masdal (Silam) i minuhot nung koporintaan pogun minaganu laang montok monguhup tinimungan B40 i po nogi’susumakit dialisis i ontokon bayaran pongusapan momolihung luluso soginumu’ RM13 montok poiduon mantad mambayar bayaran dilo’ om songkuro ginumu’ susumakit luluso id pototongkop Sabah.
James minoboros, aiso’ po atag montok popoidu’ kapambayaran kos (RM13) dilo’.
Poingkuro po, ka disio, koporintaan maya’ JPKA pinoposodia’ SBAM i aanu upalaion do susumakit luluso id siriba’ kategori B40 di kosudong.
“Kapanahakan ponguhupan diti nopo nga’ montok monginggaan tonggungan susumakit kaampai no kos mambayar pongusapan hemodialisis diolo’,” ka disio.
