Hajiji (wanan) tuminabi’ di Kumoduo Boyoon Montiri II po nogi’ Montiri Koporintaan Koiyonon om Pomuwalaian Pogun, Datuk Seri Dr. Joachim Gunsalam ontok tuminindapou Pitimungan Lintuhun Undangan Pogun (DUN) Sabah di tadau baino’.
KOTA KINABALU: Koporintaan pogun otumbayaan do kinopongukaban Ikonomi Obulou diti kosili ‘game changer’ i koposindak Sabah di koburu’ ikonomi dau, ka di Boyoon Montiri, Datuk Seri Haji Hajiji Haji Noor.
Ka disio, iti potilombus dino koposili Sabah momumuruan agayo id Ikonomi Obulou mimpau rahat om baang doid Malaysia.
Ka disio, ‘Ocean Thermal Energy Conversion’ (OTEC) nopo nga’ intodonon ginoris timpu dumontol om palan timpu anaru i kikosiwatan montok sumili ginoris oburisi’ di pointantu’ om po’ompus.
“Iti nopo kopiongoi di kopokionuan Ocean Thermal Energy Conversion Enacment 2024. Tingkananon kopio tikonogi’ OTEC diti do pinointutunan nga’ kopongimbulaian aiso’ kigatang akawas miagal hidrogen otomou, waig mineral ‘premium’ om waig pomogunan sabaagi iso’ pomorunan wagu montok mongingkawas nindopuan om monsupu’ kosiwatan pakarajaan.
“Iti nga’ kopiongoi nogi’ di inggisaman Ikonomi Obulou Koporintaan Pogun Sabah i kituduan montok momoguno intodonon maritim om kowoigan miampai po’ompus om asangal,” ka disio id pitimungan Lintuhun Undangan Pogun (DUN) Sabah do hiti di tadau baino’.
Minonimbar isio ponguhotan pinoboros di ADUN Sinili, Datuk Seri Yong Teck Lee i minudio nunu kinomogoton toi kinoburuon id kaganaan OTEC pointonod kinopolulusan Ocean Thermal Energy Conversion Enactment 2024 om poinsodia’ toi tongo’ mangangapu’ OTEC popotunda’ OTEC id Sabah.
Boyoon Montiri minoboros, Kounsol Ginoris Sabah (MTS) pinopolulus nogi’ tolu komponi nokoiyonon montok popoindalan ponorisidan koonuan kopoindalanan sabaagi laang osonong kopohompit tongo’ papapanau pomorunan nokoyonon id kopoburuan tiknologi OTEC id Sabah.
Hajiji minoboros, komponi ngaawi’ dilo’ nonuan timpu sontoun montok popoimagon pinonorisidan diolo’.
Minoboros isio, asil pinonorisidan koonuan kopoindalanan diti paatagon kawagu kumaa koporintaan pogun monotk ponimbangan om kolulusan.
“Noputan mantad kinolulusan Kounsol Ginoris Sabah, Energy Commission of Sabah (ECoS) nopo nga’ pinapalabus Conditional Letter of Award (CLOA) kuminaa tolu tinan komponi nokoiyonon dilo’ montok tuduan kopoburuan ginoris pointatap.
“Bohogian Energy Commission of Sabah nga’ nakaramit nogi’ kororohian mantad komponi labus miagal Australia om United Kingdom montok popoburu’ OTEC id Sabah.
“Boogian Energy Commission of Sabah masaan monorisid atag dilo’,” ka disio.
Suai dilo’, ka disio, ponorisidan koonuan kopoindalanan osopung (Pre-feasibility) nga’ masaan nogi’ do poindalanon do UTM OTEC maya’ piuhupan pialatan UTM (Univositi Tiknologi Malaysi) om Univositi Malaysia Sabah (UMS) montok tuduan kopoburuan projik ponimpuun loji OTEC id Sabah miampai kousinan mantad Shell MRE (Marine Renewable Program) i pikikior opongo koompokon toun 2024.
Hajiji minoboros, OTEC nopo nga’ ginoris aanu inwoguan i momoguno pisuayan linasu’ id pialatan waig rahat aralom om soibau waig rahat montok kopongimbulaian ginoris lotirik.
Isio minoboros, tumanud di naanu do moomorunding (jururunding), Sabah kaanu mongimbulai 20,000 megawatt, ilo’ nopo 15,000 megawatt id koiyonon Tisan Kotonobon om 5,000 megawatt id koiyonon Tisan Kosilahon Sabah.
“Pitimungan Ikonomi Obulou Sompomogunan Sabah 2024 (SIBEC2024)) id nakatalib id Sabah International Convention Centre (SICC) nosili koiyonon oponsol montok pinopointutun om pinapawara’ OTEC kumaa mogisusuai papamanau pomorunan di suang om labus pogun.
“Pitimungan diti okon nopo ko’ nokoimbayat mangangapu’ nga nogi’ nosili koiyonon montok pinialanan tuwa’ pomusarahan om tiknologi. Miampai mogisusuai forum om pibabarasan di pinaharo, SIBEC2024 nokouhup minongingkawas kopurimanan karait kosiwatan OTEC om mongunsub piuhupan id pialatan koporintaan, kotinanan ponolidikan om papamanau pomorunan.”
Hajiji minoboros, Skretariat Sabah Maju Jaya (SSMJ) pinopoloting apat komponen agayo pongukaban ikonomi obulou ilo’ nopo kopongonuan intodonon mamamasi rahat, koponompinian (pengekstrakan) intodonon amu’ miau nogi’ kopongimbulaian intodonon wagu, pidagangan om pongindopuan id saalom om pososorili’ rahat, nogi’ simbar kumaa koyuon kolidasan rahat.
Ka disio, iti nop onga’ kopiongoi di puralan i pinatantu’ do Kotinan Tinaru-tinaru Misompuru (United Nations).
Mantad apat komponen dilo’, ka di Hajiji, haro sokukuri’ 14 pomorunan i kikosiwatan montok poburuon om ukaban id Sabah.
- Komponen kumoiso’, ilo’ nopo nga’ kopongonuan intodonon mamamasi rahat.
(i) Kopuli kinoiyonon kiginayo 154,100 kilometer pasagi’ kopiongoi di watas Exclusive Economic Zone (EEZ) i pinatantu’ do United Nations Convention on the Law of the Sea (UNCLOS) 1982. Koiyonon EEZ di komoyon nopo nga’ kopuli 370.4 kilometer toi 200 watu nautika di Rahat China Selatan om nogi’ somboogian Rahat Sulu om Laut Sulawesi.
(ii) Montok tuduan kopongonuan intodonon rahat, koporintaan pgoun pinapalabus lisin vesel om kakamot monginsada’ di kumoiso’ kuminaa Labuan Madani Marine Sdn. Bhd. montok kapal SBF 69 om SBF 66 di ko 20tw Kohopod om Duo 2023. Kapal SBF 68 om Kapal SBF 66 sopipoopori minonimpuun kinopoindalanan pointonod ko 25tw Kaapat 2024 om 15tw Kowalu’ 2024. Lisin nopo diti nga’ i kumoiso’ pinalabus do koporintaan pogun pointonod kuasa’ pomolisinan ponginsadaan rahat aralom (C2) pinatahak kumaa koporintaan pogun id sahau Malaysia Agreement 1963 (MA63).
(iii) SSMJ nga’ minamaramit nogi’ atag montok popoburu’ off-shore fish cage mantad duo mangangapu’ suang pogun. Atag diti nga’ masaan sorisidon do urusetia mantad sunduk koonuan kopoindalanan dilo’. Id nayatan ponimpuunan, atag diti pikikiro kopohompit kopoopuan kiginumu’ 30 riong USD.
(iv) Koporintaan pogun maya’ Dewan Kakadayanagayo Kota Kinabalu, masaan mamalan montok popoburu’ dodopiton tuna om ponginsadaan rahat aralom kitopong European Union (EU) id Kota Kinabalu potilombus dino popoburu’ kawagu pasar sada’ di haro mantad. Projik diti kopohompit piuhupan miampai komponi swasta di kinawawaya’an.
(v) Id siktor ‘apotik’ toi ‘farmaseutikal’ om ‘bioteknologi’, bohogian urusetia amu’ po nakaramit nunu-nunu atag kopoopuan mantad suang om labus pogun, sundung ogumu’ nakaramit ponguhotan kopohompit kosiwatan kopoopuan ‘subsiktor’ toi pomorunan diti.
- Komponen koduo nopo nga’ ‘pengekstrakan’ intodonon rahat amu’ miau nogi’ kopongimbulaian ginoris wagu.
(i) Wookon pomorunan di poinsuang id komponen diti nopo nga’ ginoris aanu monginwagu, tumau om gas, kopongiduan tusi’ waig rahat om asil nukad mineral nanad rahat.
(ii) Id pomorunan pongiduan tusi’ waig rahat, koporintaan pogun maya’ JETAMA Sdn. Bhd. nakaanu minogowit inovasi ‘Desalination System’ i maan podokoto’ id taman pomorunan POIC Lahad Datu. Projik diti maan poindalano’ maya’ piuhupan miampai Komontirian Koburuon Pomorunan om Mongindapu’ Pogun Sabah om poindalanon maya’ karalano’ ‘Proof of Concept’ (POC).
(iii) Ababayan POC diti pikikiro kotimpuun do wulan Kotolu 2025 katalib kapadakatan sistem dilo’ do opongo. Kopongintangan projik diti piantangan id timpu tolu wulan om nung kalantoi, waig rahat di noiduan oosin paabaon kumaa tongo’ mangangapu’ pomorunan id POIC Lahad Datu. Ginumu’ waig pomorunan di maan patahako’ do sistem diti nopo nga’ soginumu’ 2.5 riong liter sangadau (JHL) om aanu ruhangan do soiraira’ nopo tumanud di kopokionuan pomorunan.
(iv) Montok tuduan pomorunan ponombuluyan, Sabah i pasanganu 407 pulou om 2,383 kilometer ilo’ nopo nga’ tisan rahat bobos anaru, kikosiwatan montok ukaban om poburuon miampai poinggirot sabaagi aset ponombuluyan. Kopongukaban kosiwatan ikonomi montok tongo’ pulou id Sabah kiguno maganu kokiraan kasasanangan om kolidasan pulou kopiongoi di kopokionuan konsep ‘daya tampung’ montok papatantu’ kogompion pulou.
(v) Montok subsiktor pongumoligan mintingisan rahat, koporintaan pogun maya’ Koupisan Kotolunan Sabah pinopoimpuun Sabah Mangrove Action Plan 2024-2033 di ko 29tw Kohopod 2024 di nakatalib montok papatantu’ koiyonon mintingisan rahat tokou poinggompi’. Iti nopo nga’ laang ogirot koporintaan pgoun montok mongingkuri’ om monoibau kolosuan global om pongingkurian karbon (decabonisation).
(vi) Malaysia pasanganu 4.7 pihatus mantad koiyonon tongor (bakau) pomogunan, nokoindikau kinoiyonon koonom posusuhut do Indonesia, Brazil, Australia, Mexico om Nigeria. Tumanud pinonorisidan di toun 2022, koiyonon tongor Sabah kiharo koiyonon gouton tongor bobos agayo id Malaysia ilo’ nopo nga’ 390,526 hektar (60 pihatus) om i nopo lobi nga’ haro id Semenanjung Malaysia om Sarawak.
(vii) Ponondulian gompi’ gouton tongor monokodung ababayan Sondikoton Kopoburuan Ouli’ (SDG) id siriba’ SDG 1: Aiso’ Komosikinan; SDG 2: Sifar Mononlous; SDG 6: Waig Oborisi’ om Sanitasi; SDG 8: Pakarajaan di Kosudong om Kosunion Ikonomi; SDG 12: Pomogunaan om Kopolobusan di Kitonggungan; SDG 13: Kosimbanon Iklim; SDG 14: Koposion id Sahau Waig om SDG 15: Koposion Tindal.
- Komponen kaapat nopo nga’ sisimbar kohondot koyuon kolidasan rahat, kopuli do Tiknologi om Ponolidikan om Kopoburuan, Karbon Obulou, Pongumoligan om Ponondulian Pongingiyonon (Habitat) nogi’ ‘Pengasimilasian’ Nutrien om Sampal.
(i) Sabaagi laang koporintaan id koponoibahan kaantaban kolidasan rahat, Longkod Ponolidikan Ikonomi Obulou om Koumoligan Maritim UMS tinuridong om pinohimagon di ko 1tw Kohopod om Iso’ 2024.
(ii) Suai dilo’, Komponi Red Sea Reef Builders i poinlongkod id Dubai, United Arab Emirates (UAE) pinopotoguang karatas atag montok popouyu surupukaraja’ kapal robotik mio’ontong koyuyuon nanad rahat i papanahon maya’ pisuk kapanamangan id tindal. Robot pogintong diti okon nopo ko ‘kaanu miontong koyuon nanad tahat nga ngoi’ koponguhup inggisaman ponondulian gompi’ ‘ekosistem’ marin. Kopouyuhan diti mamaso sorisidon om intangan do SSMJ.
