Hajiji (gibang) monongkirumo miampai Monunuridong om Monontuduk Agayo PBS, Tan Sri Joseph Pairin Kitingan id ramai Kinopoimaganan Pitimungan Mongongobi’ Toun-toun PBS ko-39 di tadau baino’.
PENAMPANG: Pibarasan karait kopogiikidan tindikohon id Gabungan Rakyat Sabah (GRS) maan pogibabarasai id mitingan akawas do tulan tiso’.
Ka do Utusan Malaysia, Boyoon Montiri po nogi’ Ponorikohon GRS, Datuk Seri Haji Hajiji Haji Noor minoboros, kopomuruanan parti minggisom montok papaharo pibabarasan lobi kosopung karait kopogiikidan tindikohon dumontol Pomilian Agayo Pogun ko-17 (PRN17).
Minoboros isio dilo’ montok mongomi kinopokionuan di Ponowoli Presiden Parti Bersatu Sabah (PBS), Datuk Seri Dr. Joachim Gunsalam i minokianu pibabarasan karait pogiikidan tindikohon id nayatan komponen GRS pohoroon lobi kosopung montok mongilag aantakan pogisisimbohan.
“Iti maan tokou inggisamai. Sapatut daa (pibabarasan)powonsoiyon tokou… papaharo tokou mitingan GRS do amu’ no alaid… Insya-Allah wulan obontol,” ka disio katalib pinopohimagon Pitimungan Mongongobi’ Toun-toun PBS ko-39, id Lintuhun Hongkod Koisaan KDCA, di tadau baino’.
Karait pisokodungan miampai Barisan Nasional (BN) – Pakatan Harapan (PH) dumontol PRN17, ka di Hajiji, GRS tumilombus monginggirot pisompuruan parti ngaawi’ id GRS kaampai no PBS.
“Do doondo yati’ id suang koporintaan GRS-PH Plus mantad dilo’, pisokodungan tokou ogirot om oulud id pialatan tiso’ om tiso’. Montok koundaran Sabah, poingukab tokou montok minoboros miampai koombolutan parti suai kaampai no BN,” ka disio.
Nokopogulu id boboroson disio, ka di Hajiji, id sunduk paganakan agayo GRS i kapaampai mantad mogisusuai parti i kiharo poburuon di mogisuaian, miilang yolo’ tuduan di miagal montok poposili Sabah lobi koburu’.
Kohondot dilo’, parti ngaawi’ id GRS kiguno tumilombus monginggirot piisaan id kopoburuan oinsanan montok kasasanangan rayat om pogun Sabah.
Minongomi kotilombus ka disio, pitimungan dilo’ kopokito nindikohon PBS sabaagi parti komponen GRS di otuo id kaganaan pulitik Sabah. Parti dilo’ nokotoguang lakun om rugi kinopoburuan montok tumimporon sabaagi parti nokoiyonon di bobos nakalaid.
Numbur 39 i poinsurat id pitimungan diti kopokito rontob kinosukodon om kinokikangon PBS id kaganaan pulitik nokoiyonon lolobi no id sunduk do Sabah.
“PBS nakawaya’ pinamanahan di anaru id kopoburuan pulitik dau gisom nakalantoi minongimbulai pipiro ‘tokoh’ di pantangon kaampai i Huguan Siou, Tan Sri Joseph Pairin Kitingan. Isio (Pairin) nakalantoi minogowit parti dilo’ miampai pointunud solinaid 31 toun om babaino’ kakal momodolundung PBS sabaagi monontuduk agayo,” ka disio.
