Arifin (kolimo, gibang) om Zainudin (kolimo, wanan) guminambar pongingitanan miampai limo mamaramit Gaa’ BKNS.
KOTA KINABALU: Sikulasip Koporintaan Pogun Sabah (BKNS) momorikot 11,800 susumikul Sabah karamit ponguhupan kousinan montok mongoput pinsingilaan id Kotinanan Pinsingilaan Akawas (IPT) saalom om labus pogun.
Ka di Montiri Sains, Tiknologi om Inovasi, Datuk Dr. Mohd Arifin Mohd Arif, sondikoton dilo’ nosusuhut kinoingkawason ginumu’ kousinan balajaran i pinoobi’ di Boyoon Montiri Sabah gisom RM113 riong montok papagaras modal insan id pogun diti.
“Koporintaan Pogun Sabah, sikulasip Koporintaan Pogun Sabah pinoingkawas kousinan dilo’ di YAB Boyoon Montiri mantad RM50 riong noondo diti nokosigampot RM113 riong montok nopo monguhup tangaanak tokou id kaganaan balajaran pinsingilaan diolo’ kosuul no id IPT om IPTA.
“Montok tangaanak i mongupalai sikulasip haro no kogogonopan dati’ i pinoimpuun di YAB Boyoon Montiri pipiro wulan di nakatalib ilo’ nopo nga’ portal koponoluodan sikulasip.
“Portal i kopotimung di tongo’ mononoluod mantad koporintaan pogun ilo’ nopo nga’ BKNS, Dermasiswa Kounsol Ugama Islam Sabah (MUIS), Sikulasip Tinimungan Yayasan Sabah kaampai Tabung Balajaran Pogun Sabah om nogi’ tongo’ inggisaman koporintaan pogun id kaganaan balajaran i 10 dilo’ BUDI, BAKTI, BISBAH, BAGUS om sopiagal dilo’. Iti inggisaman koporintaan pogun,” ka disio.
Minongomi kotilombus minoboros i Arifin, koporintaan nga’ pinopolulus nogi’ do 8,000 susumikul i karamit Ponguhupan Tusin Koporojistoran IPT (BUDI) gisom koompokon toun diti.
“Kousinan pinosodia’ montok monguhup tangaanak tokou i sumuang id univositi montok mambayar yuran diolo’.
“Yati’ haro ponguhupan BUDI ilo’ nopo nga’ ponguhupan pogulu sumuang pinsingilaan montok ijazah RM2,000 posusuhut montok diploma, matrikulasi kaanu RM1,500.
“Di toun nakatalib nopo nga’, tangaanak UMS pinosodiaan tokou do BUDI RM2,000 kumaa 2,000 susumikul om toun diti rikoton tokou oinsanan susumikul insyaAllah kiikiro 5,000 susumikul.
“Nakaanu tokou nogi’ kolulusan mantad di Boyoon Montiri gisom koompokon toun diti umbalan tokou monguhup gisom 8,000 susumikul montok kaanu ponguhupan BUDI,” ka disio pinopointalang.
Arifin po nogi’ Exco Balajaran pinapabanta’ asil mantad Ababayan Roadshow BKNS id 26 tinan IPT doid Semenanjung Malaysia nokopongilo 2,130 susumikul tinimungan B40 kosudong mamaramit sikulasip dilo’.
“Id Semenanjung doid kinohomboan dati’, kikiro 2,120 ssusumikul i pinolulusan sikulasip. Iti sikulasip Koporintaan Pogun,” ka disio.
Rinubaan isio media katalib pinapatahak surat kopouyuhan sikulasip kuminaa limo susumikul Univositi Malaysia Sabah (UMS) om tinanud di Luguan Potunud Surupukaraja’ Koporintaan Pogun, Datuk Zainudin Aman i po nogi’ Ponorikohon Puruankuasa’ BKNS do hiti, di tadau Koduo.
Tongo’ mamaramit surat kinoposilihan kapaampai di susumikul nokotonu’ ‘gadis karung’, Rafidah Zaidin (Sarjana Muda Perakaunan), Puteri Dalilah Sabri (Sarjana Muda Sains Komputer), Carlsen Chiam (Sarjana Muda Sains), Azalina Berson (Sarjana Muda Perakaunan) om i Gene Ashley Rainol (Sarjana Muda Sains).
Daamot dilo’, i Zainudin pinopoilo, kopongupalaian ponguhupan balajaran maya’ piromutan i sinompon di ko 30tw Kosiam nakatalib montok papasaga’ boogian disio popoindalan karaja’ kapanahasan om mongukab dilo’ kawagu do gisom koompokon toun.
“Nakaramit tokou kikiro 580 upalai maya’ piromutan om ukaban tokou kawagu montok kopokinsianan katalib diti om pasanganu tokou gisom koompokon toun poluluson tokou kikiro 2,000 tulun.
“Koinsanai dilo’, momorikot tokou 11,800 tulun susumikul om ponguhupan diti iso’ rikod agayo kinalantaion YAB Boyoon Montiri tu’ pogulu diti kikiro no do 5,000 susumikul di nakapaas,” ka disio.
Ka disio kawagu, boogian dau nga’ pointopot nogi’ montok popoinggumu’ kogogonopan sikulasip montook monguhup tongo’ susumikul Sabah sondikoton di pinatatap.
