Dr. Joachim (tanga’) guminambar pongingitanan miampai mogigiyon Kampung Agan katalib kinopoimaganan balai raya wagu kampung dilo’.
RANAU: Kumoduo Boyoon Montiri II, Datuk Seri Dr. Joachim Gunsalam po nogi’ ADUN Kundasang pinoposiwat timpu duo tadau kuminakap pipiro kampung id Longkod Watas Mongundi (PDM) Karagasan do hiti minimpuun ko 18tw Kowalu’.
Ontok kinotombuluyan dilo’, Dr. Joachim miampai pakakaraja’ kopoindalanan karaja’ DUN Kundasang minooi intong kosumpakon mini lintuhun Kampung Gusi i maan turidongo’ toun diti.
Pinapatahak nogi’ isio ponguhupan balatak takanon kumaa mogigiyon kampung dilo’.
Potilombus dino, Dr. Joachim pinopoimagon balai raya wagu id Kampung Agan.
Dr. Joachim (koduo, gibang) pinapatahak ponguhupan kumaa Kampung Mansalu i nobian di Ponorikohon JKKK, Saimina.
Id Ababayan Miampai Lansanon i pinapanau doid Kampung Karagasan do talib dilo’ i notindapou mogigiyon mantad turu’ kampung poinsuang PDM dilo’, isio po nogi’ Montiri Koporintaan Koiyonon om Pomuwalaian (KKTP) minokianu di tongo’ molohingon kampung om tongo’ Ponorikohon Puruankuasa’ Koburuon om Koumoligan Kampung (JKKK) tumilombus misokodung miampai Unit Lansanon Kobuuron Mogigiyon (UPPM) DUN Kundasang id oinsanan haal poinghompit kaamapi papatantu’ kaadangon pulitik.
Dr. Joachim minonongkounsikou nogi’ sokodung di pinatahak gisom noondo diti om lumansan sokodung kotilombus gisom Pomilian Agayo Pogun ko-17 (PRN17) obontol.
Nunsub nogi’ disio mogigiyon kampung id PDM dilo’ do monokodung isai nopo i poungkakaton Gabungan Rakyat Sabah (GRS) id PRN17.
Dr. Joachim (tanga’) guminambar pongingitanan miampai mogigiyon Kampung Agan katalib pinapatahak toluod balatak takanon kumaa mogigiyon do hilo’.
Dr. Joachim minogolim nogi’ totondos i monondos disio mimbulai no ontok timpu pomilian agayo nopo, pinopointalang do impipiro no isio papaharo kotombuluyan kumaa PDM dilo’.
Dr. Joachim minoboros, koporintaan nga’ nokopoindalan ogumu’ projik koburuonon montok koundaran mogigiyon id DUN Kundasang miagal do pangaba’ lotirik, projik talun-alun i masaan poindalan pakaya’an id SMK Ulu Sugut/PDM Kaingaran om kumaa Mini Estet Sejahtera (MESEJ) Kampung Mansalu nogi’ pangaba’ waig oburisi’ pointonod nosili mobi’ rayat id DUN Kundasang.
Dr. Joachim (tanga’) guminambar miampai mogigiyon Kampung Gusi ontok minooi intong kosumpakon lintuhun okoro’ wagu kampung dilo’.
“Koburuon miagal idti maan tilombuso’ do koporintaan doondo i buruanon do GRS,” ka disio.
Id ababayan dilo’, Dr. Joachim pinapatahak nogi’ do ponguhupan injin buut kumaa di Ponorikohon JKKK Kg. Agan, Kg. Namaus, Kg. Gusi om Kg. Karagasan.
Nokotindapou ii Monunurat Pulitik disio, Yubidi Gumpoyo; Luguan Watas I, OKK Muhasip Haji Ruman; Luguan Watas II, Dominic Ganie; Popoburu’ Mukim, Ratimin Kokonut; Mobi’ Luguan Tanak Mamasok Pgoun (WKAN) i po nogi’ Ponorikohon Manganganjur, Ajip Basanun; mobi’ kumaa Puru Parlimen Ranau, Ronie Demok; tongo’ mobi’ KAN, molohingon kampung om tongo’ ponorikohon JKKK.
