Dr. Joachim (tanga’) guminambar miampai oinsanan i nokotindapou id Mitingan Agayo Toun-toun Ko-39 montok Limo PBS Bohogian dilo’.
BEAUFORT: Parti Bersatu Sabah (PBS) misokodung miampai oinsanan komponen id Gabungan Rakyat Sabah (GRS) doid Pomilian Agayo Pogun Ko-17 (PRN17).
Ponowoli Presiden PBS, Datuk Seri Dr. Joachim Gunsalam minoboros, PBS mimburu’ id GRS.
“PBS toririmo pointatap poingampai doid GRS i buruanon di Datuk Seri Haji Hajiji Haji Noor sabaagi Boyoon Montiri.
“Otumbayaan oku iti nopo nga’ timpu tokou mongingkawas inggisaman om nung kaanu kiguno tokou papalantoi GRS id koinsanai koiyonon i tondingon tokou.
“PBS mongigit batos, ‘we are with GRS’,” ka disio pinoposotol ontok pinopoimagon Mitingan Agayo Toun-toun Ko-39 montok limo Bohogian Poonsokid Siba — N.30 Bongawan, N.31 Membakut, N.32 Klias, N.34 Lumadan om N.35 Sindumin — id Lintuhun Pa’ Musa, do hiti di koniha (ko 4tw Kowalu’).
Nolim po nogi’ disio totondos video nokotonu’ i tinootomod minomowonsoi om pinatayad do pembangkang id media sosial i mongomi PBS-STAR tumanding mimpoopori id PRN obontol.
Dr. Joachim po nogi’ Kumoduo Boyoon Montiri II nga’ minokianu nogi’ oinsanan luguan bohogian kaampai no okon ko’ mobi’ rayat kumaraja’ agaras montok mongingkawas ginaras parti id bohogian sompoopori.
Mimang isio oinsanan puru parti tumilombus kumaraja’ montok papatantu’ kopotutan ngaawi mogigion Sabah poinggompi’.
Kaakun do okon ko’ sasanang monugat kopotutan ngaawi’ diti sundung poinsuang id Koundangan, pinoposorou isio oinsanan puru PBS do monilombus kopoburuan.
Soginumu’ lobi 800 puru PBS nokotindapou id mitingan dilo’.
Minanangkabayahan isio kumaa kolimo-limo bohogian PBS om oinsanan raan diolo’ tu’ nakapaharo AGM nayatan bohogian.
Kohondot dilo’, Timbang Presiden PBS, Datuk Haji Ruslan Muharam po nogi’ Luguan Bohogian N.34 Lumadan nga’ minonongkounsikou mantad kinorikotan di Dr. Joachim id mitingn diti baino’.
Nokotindapou nogi’ Kumoduo Presiden PBS, Datuk Jahid Jahim; tongo’ Timbang Presiden io’ Datuk Johnny Mositun dii Datuk Arthur Sen; tongo’ Luguan Bohogian, Jitim Abak, Egol Onsim, Hamim Gunsim om Angian Alai; Luguan Koonduan, Datin Malianah Ugau; Monunurat Karaja’ PBS, Mesilus Roman; Luguan Komulakan, Dr. Christoper Mandut; Ponorikohon Manganganjur po nogi’ Kumoduo Luguan, Dioslin Alin; tongo’ Puru Kounsol Akawas, Exco Koonduan, Exco Komulakan om mio’ontong, Luguan Bohogian komponen id GRS.
