Hajiji pinopowonsoi do ababayan Kinopoimpuunan Wulan Kabansaan, Tadau Sabah om Kimpin Pokili Bondira’ Nayatan Pogun 2024 id natad linimput Lintuhun Bandaraya Kota Kinabalu (DBKK), do hiti di tadau baino’.
KOTA KINABALU: Kapamaramaian Tadau Kabansaan toun diti kirati kopio sabab Sabah nga’ mamaramai nogi’ Tadau Sabah soira’ Koporintaan Pogun di tulan Koonom katatalib pinopoimagon montok momuhondom tadau kisusuyan dilo’.
Boyoon Montiri, Datuk Seri Haji Hajiji Haji Noor lumansan do aiso’ koburilongon kosuul no id sunduk kopongonjuran Tadau Kabansaan om Tadau Sabah sabab montok pogun diti, Tadau Sabah i maan ramaiyo’ do 31tw Kowalu’ diti kosili impuunon monompuru mogigiyon orukut tinaru montok umampai popoburu’ pogun diti.
Ka disio, Tadau sabah po nogi’ nga’ momuhondom tadau ponokotanda’ kinoompokon pomorintaan Boritis id Sabah di ko 31tw Kowalu’ 1963 om nokotimpuun pamanahan tokou toinsanan montok pomorintaan sondiri’ om minonuridong pomogunon Malaysia.
“Mokianu tokou mogigiyon kosuul no sukod wagu do lobi koilo susuyan kahandaman okon nopo ko’ karait do Tadau Kabansaan nga nogi’ Tadau Sabah. Nga’, i lobi koponsol nopo sunduan tokou montok tumilombus mogiuhup popoburu’ om popotunda’ pogun diti om pomogunon tokou di koupusan,” ka disio id Ramai Kinopoimpuunan Wulan Kabansaan, Tadau Sabah om Pokili Bondira’ Nayatan Pogun 2024 id natad linimput Lintuhun Bandaraya Kota Kinabalu (DBKK), do hiti, di tadau baino’.
Ka disio, inggisaman koporintaan pogun minogowit koburuon om komogoton kumaa mogigiyon om pogun diti, pipiro siktor oponsol id ababayan Sondikoton Sabah Maju Jaya (SMJ) kotilombus tingkananon, wookon dilo’ kojominon taakanon, mongingkawas kopoopuan mantad suang om labus pogun nogi’ ponombuluyan, momupus mosikin ‘tegar’, kopoingkawasan tongo’ kogogonopan, balajaran, kopoingakwasan kapatahakan surupukaraja’ om koumoligan.
Minoboros isio, koporintaan nga’ moningkanan nogi’ do ‘modal insan’ kosuul no sukod wagu i tumungkus kopomoruanan timpu dumontol, mooi do minggisom lobi kaparagat id kopomususan kobontugan pomogunon mantad osimbayag do bohogian aiso’ tinonggungan.
Ka disio, ‘Malaysia Madani: Jiwa Merdeka’ pinili’ sabaagi uhu Tadau Kabansaan om Tadau Malaysia toun diti, kopokito tonggungan tokou montok tumilombus popoburu’ songinan mogigiyon di aadang om ounsikou.
“Uhu diti nga’ kopogowit nogi’ do rati koponsolon dati’ papatantu’ koburuon om komogoton suai ko’ kopokito kosimbayanan mogigiyon mantad nunu-nunu koyuon poinsala’ doid kopokitanan sunduan ‘patriotik’ maya’ sunduk pomusarahan, pihunungan sosial om ikonomi,” ka disio.
Hajiji lumansan mooi do mogigiyon tumilombus monginggirot pisompuruan om piuludan i nosili ginaras agayo id kopoburuan om komogoton pomogunon om pogun diti. Otopot nopo, mogigiyon kiharo tonggungan di agayo id kopomogompian om kopongumoligan pisompuruan di poinharo mantad.
Kopihondot pamaramaian Tadau Kabansaan, Tadau Sabah om Kimpin Pokili Bondira, pinokianud isio mogigiyon Malaysia id pogun diti do popokili Jalur Gemilang om bondira’ Sabah id kinoiyonon sompoopori, linimput upis om premis pongindopuan nogi’ padsakaian po’ompus kapamaramaian dilo’ sabaagi ponokotanda’ kopongunsikohan di kinomordikaan naramit.
“Tantu’ no do mantad haro sunduan om tonggungan di akawas montok oinsanan papalantoi kapamaramaian diti, otumbayaan oku do Jalur Gemilang om bondira’ pogun toririmo poingkili miampai koondosan sabaagi kointalangan tokou toinsanan osompuru ginawo montok momusus om monuang do kinomordikaan,” ka disio.
Hajiji minoboros, mogisusuai ababayan pinalan po’ompus Wulan Kabansaan toun diti, wookon dilo’ Kembara Merdeka, Simfoni Jiwa Merdeka om ababayan Merdeka@Komuniti Nayatan Parlimen om DUN.
“Wulan Kabansaan okon nopo ko’ kapamaramaian toomod, nga nogi’ kosiwatan montok dati’ minsomok do mogigiyon, monilombus sunduan kopoburuan om patriotisme id nayatan mogigiyon orukut tinaru pogun diti,” ka disio pinoposotol.
