Dr. Joachim (tanga’) guminambar pongingitanan miampai oinsanan puru PBS i nakarapou id AGM PBS Bohogian N.36 Kundasang, N.37 Karanaan om N.38 Paginatan.
RANAU: Ponowoli Presiden Parti Bersatu Sabah (PBS), Datuk Seri Dr. Joachim Gunsalam minagangat do komulakan id Sabah montok sumompuru parti id kopogowitan angkab mogigiyon nogi’ momumuruan id ‘inovasi’ om koburuon pogun diti.
“Kaanu tokou monuridong songinan parti i okon nopo ko’ mongobi’ angkab mogigiyon nga nogi’ momuruan id inovasi om koburuon. Kohompitan dokoyu okon nopo ko’ pokimamahaan, nga nogi’ oponsol kopio. Pologoson rolou dokoyu opokinongou om pologoson laang dokoyu koponuridong timpu dumontol Sabah,” ka disio.
Isio po nogi’ Kumoduo Boyoon Montiri II minoboros, PBS okito kikosiwatan, sunduan om pongunsub sukod wagu.
“Yokoyu nopo nga’ timpu dumontol pogun di abaal om ginoris dokoyu nopo nga i gunoon dahai montok mongoi id toguang. Mantad dilo’, id koobian oinsanan puru PBS magalap dokoyu ngaawi’ do sumompuru PBS, montok mogowit pomusarahan wagu om sunduan di akawas dokoyu kumaa nuludan dahai. Kanou tokou no mogiuhup,” ka disio ontok pinopoimagon Mitingan Agayo Toun-toun Ko-39 toun 2024 montok tolu Bohogian — N.36 Kundasang, N.37 Kaaranaan om N.38 Paginatan — id Lintuhun Mogigiyon Ranau, do hiti di konihab (27tw Koturu’).
“Kumaa puru PBS i kitonggungan, norikot nodii timpu montok tumungag kawagu om tumilombus popouhup kumaa kosunion om kalantaion parti.
“Mositi’ tokou popouhup kumaa kosunion om kalantaion parti. Tikid mantad dati’ kiharo tonggungan i kiguno poindalanon om, mogiampai tokou mamagampot bantug PBS.
“Kanou tokou no posikito’ kawagu sunduan om tonggungan tokou nogi’ kumaraja’ miampai amu’ apaasan montok monginggirot parti tokou. Pisompuruan om karaja’ agaras toririmo kosili impohon tokou, om mositi’ tokou papatanom do koyuyuon diti.”
Dr. Joachim (koduo, gibang) minamaramit skol ‘ikrar’ mantad di Timbang Luguan Komulakan II PBS N.36 Kundasang, Muhammad Adli Somihin.
Minoboros isio, PBS toririmo kosili kopokitanan pisompuruan mogigiyon Sabah.
Ka disio, susuyan laid nopo nga’ kointalangan ginaras parti montok monompuru mogigiyon di orurukut id siriba’ sepanduk di miagal.
“Noondo diti, id siriba’ Gabungan Rakyat Sabah (GRS), kikosiwatan tokou do popoinggayo po pisompuruan diti. Minggisom tokou montok monompuru kawagu parti nokoiyonon i miilang ‘visi’ om sondikoton tokou. Pokionuon ku oinsanan tinaru do tumonggoi popoburu’ id siriba’ dolundung GRS maya’ PBS om tambalut piomungan. Miampai tokou, kaanu monuridong Sabah di lobi ogirot om misompuru.
“Momoguno tokou rolou di lobi kologod id koponguludan pogun tokou. Montok mamagampot rikoton diti, mositi’ tokou kalantoi lobi kogumu’ tindikohon id pomilian agayo obontol. Iti okon ko’ karaja’ montok no do wookon tulun nga tonggungan montok dati’ toinsanan. Yahai momoguno sokodung dokoyu, tonggungan dokoyu, om undi dokoyu. Pamahanan id toguang pikikiro kikaantaban, nga’ mantad pisompuruan om angkab, koponoibau tokou nunu nopo kohimpogongan,” ka disio.
“Nung kaanu GRS kalantoi id koinsanai 73 watas Lintuhun Undangan Pogun (DUN) Sabah, ka di Dr. Joachim.
“Kanou tokou no oinsanan mungkakat, miuhup om poposili PBS kabantug kawagu montok timpu dumontol Sabah, do koburuon mogigiyon tokou, om montok kotilombuson parti agayo tokou,” ka di Luguan Bohogian PBS Kundasang dilo’.
Ka disio, parti i koupusan diolo’ diti, i mimpau do pisompuruan om koburuon, monugat mogigiyon Sabah lolobi no sukod wagu, do sumompuru id kopoburuan diti.
Minanangkabayahan nogi’ isio kumaa kototolu bohogian tu’ nakapaharo AGM ko-39.
PBS kiangkab mogihum kaadangon montok oinsanan mogigiyon Sabah om iti nopo ng’ iso’ poburuon tingkananon PBS.
“Kalansanan tokou id PBS nopo nga’ mooi do timpu obontol, oinsanan tokou misompuru om mogiuhup momogusa’ koburuon miampai otoronong om aadang.
Nokotindapou nogi’, Kumoduo Presiden, Datuk Jahid Jahim; Luguan Bohogian PBS N.37 Karanaan, Datuk Bernard Dalinting; Luguan Bohogian PBS N.38, Datuk Arthur Sen; Monunurat Agayo PBS, Datuk Lu Kim Yen; Luguan Komulakan, Dr. Christoper Mandut; Luguan Kopointalangan PBS, Datuk Joniston Bangkuai; Timbang Presiden, Datuk Haji Ruslan Muharam om Datuk Daniel Kinsik; Ponorikohon Manganjur, Japli Sami; Monunurat Eksekutif PBS, Mesilus Roman; tongo’ Puru Kounsol Akawas, tongo’ Luguan Bohogian, Luguan Mogigiyon, mongingigit adat nogi’ mio’ontong mitingan.
Pinapanau nogi’ kinapatahakan foom kosompuruan wagu PBS kuminaa di Dr. Joachim mantad lobi 30 tinan kampung miampai ginumu’ 1,741 puru wagu om kinapatahakan toluod soginumu’ 750 tinan timpohon kumaa 14 kampung i pinatahak di Dr. Joachim.
