Dr. Joachim (poindikau, tanga’), Dr. Jamili (poindikau kotolu, gibang), Alexander (poindikau kotolu, wanan) guminambar pongingitanan miampai koinsanan i nokotindapou id Ababayan Koburuon Mogigiyon Watas Kudat doid Dataran Tomborungus, di tadau baino’.
KUDAT: Komontirian Koporintaan Koiyonon om Pomuwalaian (KKTP), maya’ Bohogian Kikuasa’ Nokoiyonon (PBT), toririmo minggisom montok papatantu’ kiwaya’ id kapatahakan surupukaraja’ di patahakon kumaa mogigiyon nokoiyonon.
Kumoduo Boyoon Montiri II po nogi’ Montiri KKTP, Datuk Seri Dr. Joachim Gunalam minoboros, mogisuai ababayan pinapalan om sondikoton di nulud mooi do osigampot tingkananon kopio.
“Id timpu doun kaawagu diti, yahai id komontirian om PBT toririmo mumbal momusorou id labus noubasan montok papatantu’ kasasanangan koposion aanu monigampot.
“Okon nopo ko’ id sunduk koburuon nga nogi’ mongingkawas rontob koposion nogi’ papatantu’ koyuon pososorili’ nopo nga’ osimbayan, kapanahak kounsikohan om potilombus dino kapatantu’ koingkawason kumaa ‘indeks’ naangayan koposion,” ka disio ontok Ababayan Koburuon Mogigiyon Watas Kudat ki’uhu “Komuniti Prihatin” id Dataran Tomborungus, do hiti, di tadau baino’.
Ababayan dilo’ piniuhupan manganjur do KKTP om Kotinanan Kakadayan Kudat (LBK).
Minononongkounsikou kumaa LBK mantad tonggungan pinapalantoi ababayan diti, Dr. Joachim minoboros, Ababayan Koburuon Mogigiyon nopo nga’ wookon kaparagatan i pino’iliu id nuludan KPI Komontirian sabaagi inggisaman montok minsomok mogigiyon nokoiyonon om kapasaga’ komontirian do mamarati kogugunoon maso-maso mogigiyon toisiso’ watas.
Suai ko ilo’, ilo’ po nogi’ nga’ iso’ mantad inggisaman komontirian do popoilang kointalangan kohondot haal ngaawi’ maso-maso om maganu sisimbar mantad tulun ginumuan.
“Kalansanan ku nunu i pinatahak di tongo’ mononomboros id maso ponomborosan aanu silihon kointalangan di kiguno kumaa oinsanna i nokotindapou di tadau baino’ diti,” ka disio, i minoboros ababayan miagal diti nga’ pohoroon nogi’ id watas suai.
Pokikitanan, pialaan momowotik om kimpin monoluod raha’ nga’ pinaharo nogi’ ontok ababayan dilo’, suai ko’ kinapanahakan vaksin HPV miampai aiso’ kabayar i po nogi’ wookon ‘ababayan momorikot’ kumaa diolo’ i kiumur pialatan 13 toun gisom 20 toun.
Ababayan dilo’ pinotonggoi po nogi’ di Kotombuluyan Kembara Dr. Joachim kumaa pipiro watas. Isio kopopongo nogi’ pinapaharo Kinotombuluyan Kembara kuminaa id watas Ranau om Pitas di konihab.
“Iti po nogi’ inggisaman id bohogian ku om komontirian do mindahu’ om mintong sondiri’ kopoindalanan PBT id tikid watas,” ka disio.
Dr. Joachim minoboros, di doun kosuabon tadau baino’ pinapaharo isio kinotombuluyan id upis LBK hinombo do nonuan isio kointalangan kohondot karalano’ om palan nogi’ kaantaban i potoguang do LBK.
Otumbayaan isio do LBK toririmo popoindalan di bobos osonong montok watas Kudat.
“Tantu’ no do kaantaban om kohimpogong id kapatahakan surupukaraja’ toririmo do haro, nga’ mantad sokodung do oinsanan bohogian, kaanu ilo’ do moningkuri’ pisuayan di haro.
“Kudat nopo nga’ pasanganu koinsanai mogigiyon dau, kalansanan ku do haro inggisaman om pisokodungan mantad diolo’ toinsanan montok popoburu’ po do watas diti.
“Kudat nopo nga’ wookon watas i kiharo pongimbayat om kikosiwatan do poburuon. Kosili iso’ i kopomorugi’ nung aiso’ pisokodungan mantad oinsanan bohogian. Gunoon pawaya’an di kohunung id kapatahakan kobolingkahangan om atag. Pisokodungan mantad oinsanan nopo nga’ ralan panalasaian di bobos osonong,” ka disio.
Nokotindapou nogi’, Monunurat Pointatap Komontirian, Datuk Dr. Jamili Nais; Kumoduo II Monunurat Pointatap Komontirian, Faridah Giau, Upisor Watas Kudat po nogi’ Pesuruhjaya LBK, Alexander Yong; Ponorikohon Tribunal Koponugatan Momomoli Pomuwalaian, Juprin Wong nogi’ tongo’ molohingon mogigiyon.
Pinapanau nogi’ kinopoimaganan upis wagu LPK.
Pogulu dilo’, Dr. Joachim tinanud di Dr. Jamili minokinongou kopointalangan Kotombuluyan Kembara Kumaa Bohogian Kikuasa’ Nokoiyonon Kounsol LBK, i pinatahak di Upisor Eksekutif, Harun Ariffin.
Kapt:
