Dr. Joachim (koduo, gibang) miampai di Joniston pinapalahat “Bersatu” id mitingan agayo toun-toun PBS N.15 Kiulu.
KIULU: Ponowoli Presiden Parti Bersatu Sabah (PBS), Datuk Seri Dr. Joachim Gunsalam minokianu sukod wagu ngaawi’ do momuginawo poburuon parti di olidang.
“Maya’ no do pomurotian diolo’ do kopongimbulai kopurimanan tumopot montok monokodung PBS.
“Poburuon PBS nopo nga’ iso’ poburuon di olidang,” ka disio, i minoboros intangan disio komulakan om sukod wagu nopo nga’ timpu dumontol parti.
Dr. Joachim (kotolu, wanan), Joniston om puru PBS Bohogian Kiulu pinapalahat “Bersatu”.
Dr. Joachim po nogi’ Kumoduo Boyoon Montiri II minoboros pinopoimagon Mitingan Agayo Toun-toun PBS Bohogian N.15 Kiulu id Kampung Malangang Lama, do hiti di konihab (8tw Koturu’).
Natag nogi’ disio oinsanan puru PBS Kiulu do tumilombus misompuru id Gabungan Rakyat Sabah (GRS).
Minoboros isio, memorandum pihunungan (MoU) di nokopikogos miampai StarSabah kopogirot po do GRS.
Ka disio, oinsanan puru PBS kiguno misompuru monokodung kopomuruanan parti potilombus dino sumili nomungan di agaras.
“Kiulu nopo nga’ iso’ tindikohon i kikosiwatan manahak kalantaion kumaa GRS om oinsanan puru mositi’ momusus tindikohon di nalantoi pogulu diti.
Dr. Joachim (koduo, gibang) minamaramit tandamato mantad di Joniston.
“Bayahan kumaa Luguan Bohogian PBS Kiulu po nogi’ ADUN Kiulu, Datuk Joniston Bangkuai om oinsanan puru PBS i nakaanu pinapaharo mitingan agayo toun-toun id nayatan bohogian,” ka di Dr. Joachim.
“Potontuon tokou o kalantaion dilo’ do otumboyo’ miampai kumaraja’ agaras om kiguno misompuru,” ka disio.
Nokotindapou nogi’ i Kumoduo Presiden PBS po nogi’ Puru Lintuhun Undangan Pogun (ADUN) Tamparuli, Datuk Jahid Jahim; Monobubut PBS, Datuk Lu Kim Yen; Timbang Presiden, Datuk Johnny Mositun; Luguan Komulakan GRS po nogi’ ADUN Telupid, Datuk Dr. Jonnybone Kurum; Luguan Tinimungan Komulakan PBS, Dr. Christoper Mandut; tongo’ Luguan Bohogian, Ponorikohon Pointatap Mitingan, Stanis Buandi; tongo’ mongongobi’ mantad koombolutan komponen GRS nogi’ Exco Tinimungan Koonduan om Komulakan.
