Hajiji (tanga’) guminambar miampai tongo’ lansanon om tutumanud Ababayan Kopointalangan Haal Ngaawi’ Maso-Maso Biro Kopointalangan Gagasan Rakyat id Longkod Konvensyen Sompomogunan Sabah (SICC), Kota Kinabalu, konihab.
KOTA KINABALU: Tongo’ luguan kopointalangan Parti Gagasan Rakyat Sabah (Gagasan Rakyat) id nayatan bohogian pinokianu popointalang koinsanai kinalantaion inggisaman koporintaan babaino’ diti i nosigampot kumaa rayat.
Haal dilo’ wookon i pinosotol di Presiden Gagasan Rakyat, Datuk Seri Haji Hajiji Haji Noor ontok pinopoimagon Ababayan Kopointalangan Haal Ngaawi’ Maso-Maso pinaanjur Biro Kopointalangan Gagasan Rakyat id Longkod Konvensyen Sompomogunan Sabah (SICC), do hiti, konihab.
Hajiji po nogi’ Boyoon Montiri minoboros, ababayan nopo dilo’ nga’ montok di tongo’ luguan kopointalangan mongulud kukumaraja’ parti dilo’.
“Ababayan nopo diti nga’ pinotomod montok koinsanai luguan parti id nayatan bohogian, hontolon dilo’ montok mongulud kukumaraja’ parti sabab timpu koporintaan di haro do babaino’ diti nopo nga’ gisom no do wulan Kohopod toun tiso’.
“Mantad diti, haal noubasanan tokou momolohou kurusus montok papatantu’ oinsanan kukumaraja’ tokou lobi koulud montok monoguang pomilian agayo i maan pohoroo’ do amu’ no alaid diti,” ka disio ontok rinuba’ magaganu habar katalib ababayan dilo’.
Minongomi kotilombus karait ababayan dilo’, ka di Hajiji, aiso’ haal suai nga’ minanahak no do kopointalangan karait di tongo’ inggisaman i nosigampot do koporintaan noondo diti.
“Ababayan diti haal nopo kopointalangan, pinokianu tokou yolo’ (tongo’ luguan kopointalangan) do popointalang kumaa rayat di tongo’ inggisaman i nosigampot do koporintaan do noondo diti sabab ogumu’ inggisaman, kinalantaion tokou i amu’ po nakawara’ kumaa nayatan siriba’, haro i amu’ nokoilo pia, mantad dilo’ iti no tonggungan diolo.
“Mositi’ diolo’ do popointutun kumaa rayat naangayan nunu i nowonsoi, nunu i nokouhup kumaa rayat, kumaa tulun mosikin om sopiagal dilo’, songkukro gatang kopoopuan di nokosuang pointonod tokou minomorinta’ nogi’ tongo’ kosiwatan pakarajaan i rinibuan no rayat tokou do nakaanu om sopiagal diti. Iti oponsol,” ka disio pinoposotol.
Suai dilo’, pinokianu nogi’ disio o tongo’ luguan kopointalangan parti do mongilag koinsanai totondos i pinobigod kumaa koporintaan babaino’ diti.
“Kiguno yolo’ mongilag tongo’ totondos dom tongo’ tudut ngaawi’ i nokotonu’ id media sosial, ilo’ kiguno soibahan, nung amu’ nga’ otumbayaan o rayat dadamot do amu’ ilo’ otopot. Nosili ilo’ do karaja’ luguan kopointalangan id oinsanan nayatan,” ka disio.
