Dr. Joachim miampai di Ahmad (tanga’) guminambar miampai koinsanai tutumanud QTECH Online System.
KOTA KINABALU: Qhazanah Technology Sdn. Bhd. (QTSB) miampai sokodung Komontirian Koporintaan Koiyonon om Pomuwalaian (KKTP) Sabah pinopoimpuun iso’ sistem id piromutan roitan QTECH Online System do hiti di konihab.
QTECH Online System kihontolon montok monginsanang karalano’ kopongupalaian kopohompit kogogonopan telekomunikasi id Sabah.
Ramai kinopoimpuunan nopo diti iso’ po laang oponsol id inggisaman monigampot angkab Sondikoton Sabah Maju Jaya (SMJ) om kosimbanon digital Sabah.
Ramai dilo’ pinoimagon di Kumoduo Boyoon Montiri II po nogi’ Montiri Koporintaan Koiyonon om Pomuwalaian, Datuk Seri Dr. Joachim Gunsalam i minongobi’ di Boyoon Montiri, Datuk Seri Haji Hajiji Haji Noor.
Nokotindapou nogi’, Monunurat Pointatap KKTP, Datuk Dr. Jamili Nais; Ponorikohon QTSB, Datuk Awang Ahmad Sah Awang Sahari; Kumoduo Monunurat Pointatap KKTP, Stanley Chong; Kumoduo Ponorikohon QTSB, Datuk Maznah Abdul Ghani; Kumoduo Luguan Upisor Eksekutif Qhazanah Sabah Berhad, Rudy Jaglul om i Luguan Upisor Eksekutif QTSB, Mikail Sungaiu Abdullah.
Dr. Joachim (kotolu, gibang) ruminamit tandamato pongingitanan di Ahmad.
Ahmad Sah i boboroson disio pinopolombus kopongunsikohan kumaa KKTP mantad sokodung ouli’ kumaa QTSB.
Suai ko ilo’, pinopolombus po nogi’ isio koondosan di kinaparagaton puru karaja’ QTSB i mininggisom id kinopoindalanan kopoimpuunan sistem diti.
Kalansanan disio oinsanan kotinanan, komponi telekomunikasi om Bohogian Kikuasa’ Nokoiyonon (PBT) do maganu koundaran inggisaman diti do poinponu’ montok popoingkawas rontob kapatahakan om surupukaraja’ di kaanu manahak koundaran kumaa mogigiyon om ikonomi Sabah.
Sistem id piromutan nopo diti nga’ kopiongoi di inggisaman Koporintaan Digital Mimpau Tiknologi om Inovasi id siriba’ Sondikoton SMJ.
Mantad haro sistem diti, kopongupalaian, kuiri om kolulusan kopohompit kogogonopan telekomunikasi koindalan maya’ digital, kopongingkawas kopulokison karaja’ om koponginsikap kapatahakan surupukaraja.
Ababayan dilo’ kapanau duo tadau ilo’ nopo nga’ gisom di tadau baino’ (26tw Koonom) om kopohompit mogisusuai koginanan miagal PBT om komponi telekomunikasi.
Ontok tadau kumoiso’, suai ko’ ababayan kinopoimpuunan sistem, sesi bingkil nga’ pinapanau di doun sodopon montok manahak kopoilaan kumaa tongo’ mongongobi’ PBT di kararalano’ pomorunaan sistem id piromutan diti.
Daamot, tadau kosuo tinilombus miampai sesi bingkil miampai komponi telekomunikasi.
