Hajiji (tanga’) om Ponorikohon Tinimungan Kibing, Yu Qibing suminasi’ ababayan suminain MoU. Koporintaan Pogun nobian di Monunurat Pointatap Komontirian Koburuon Pomorunan om Mongindapu’, Datuk Thomas Logijin (poindikau koduo, gibang) om Luyar Agayo Pogun, Datuk Nor Asiah Mohd. Yusof (poindikau, gibang) naamot Kibing nobian di Celine Lee (poindikau koduo, wanan) om i William Chen (poindikau, wanan).
KOTA KINABALU: Koporintaan Pogun maya’ Komontirian Koburuon Pomorunan om Mongindapu’ pinopikogos Memorandum Pihunungan (MoU) miampai tanak komponi Kibing Group, SBH Kibing New Solar Energy (M) Sdn. Bhd. montok popoinggayo kopoopuan dau id Sabah.
Sinasi’ di Boyoon Montiri Datuk Seri Haji Hajiji Haji Noor id iso’ ababayan i pinoindalan doid upis SBH Kibing Solar New Solar Energy (M) Sdn. Bhd. doid Taman Pomorunan Kota Kinabalu (KKIP) di tadau baino’, MoU dilo’ kopotanda’ tonggungan SBH Kibing New Solar Energy (M) Sdn. Bhd. montok monuridong kilang momonsoi soromin solar miampai onom rulud kopolobusan wagu id Kimanis, Papar.
Boyoon Montiri minoboros, kinoburuon kaawagu diti kopokito inggisaman Koporintaan Pogun montok monginsikap kosunion siktor pomorunan dau kiwaya’.
Pinosotol disio do inggisaman “Mesra Pelabus Sabah” (Osuau Papaapu’ Sabah) miagal pinosurat id palan koburuon Sondikoton Sabah Maju Jaya nokopongingkawas kotumbayaan tongo’ mangangapu’ om id kopongimbayatan komponi labus kumaa pogun diti om montok kopoopuan di haro mantad do gumayo.
Koporintaan pogun, maya’ Komontirian Koburuon Pomorunan om Mongindapu’, pointootopot do mongulud om papasanang kopoopuan diti montok papatantu’ kopoindalanan dilo’ kalantoi om koposikap kosunion ikonomi id pogun diti, ka disio.
Kopoopuan wagu SBH Kibing pikikiro kiginumu’ RM7.2 bilion i poindalanon id tolu fasa, kopongimbulai 5,000 kosiwatan pakarajaan montok mogigiyon Sabah.
Tinimungan Kibing nakapaapu’ no lobi RM3 bilion id kilang kapamansaian togis silika om kilang momonsoi soromin solar i nakapanahak 1,800 pakarajaan id KKIP.
Komponi dilo’ pinopoilo nuludan kopolobusan kotolu kumaa kogogonopan di poinharo mantad id KKIP i mongobi’ kopoopuan pomoruhang pikikiro RM700 riong om kopongimbulai kikiro 600 kosiwatan pakarajaan pomoruhang.
Kilang kapamansaian SBH Kibing New Solar Engery (M) Sdn. Bhd. do noondo diti kapalabus 1,200 tan soromin solar tikid tadau, i koingkawas induo pilipat kumaa 2,400 tan sangadau dumontol wulan diti (Koonom 2024).
Nokotindapou nogi’ i Kumoduo Boyoon Montiri II po nogi’ Montiri Koporintaan Koiyonon om Pomuwalaian, Datuk Seri Dr. Joachim Gunsalam; Montiri Koburuon Pomorunan om Mongindapu’, Datuk Phoong Jin Zhe; Montiri Koburuon Labus Kakadayan, Datuk Jahid Jahim om Konsul Jeneral China id Kota Kinabalu, Dr. Huang Shifang, o wookon.
