Dr. Joachim (tanga’) suminasi’ di Masiung (gibang) om i Wilson minitabi’ katalib nokopongo pinisoinan pibatosan piuhupan dilo’.
KOTA KINABALU: Soginan projik koburuon mogirolot-rolot kigatang RM478 riong maan turidongo’ id Semporna.
Projik dilo’ poindalanon miampai pisokodungan do Kotinanan Koburuon Pomuwalaian om Kakadayan (LPPB) om Cepat Hebat Sdn. Bhd. id iso’ koiyonon doros Kampung Tinagayan.
Kopohompit ilo’ do koponuridongan duo hotel i sopipoopori topong 3 om 4 ‘bintang’, nogi’ linimput upis om pasaragayo.
Kumoduo Boyoon Montiri II po nogi’ Montiri Koporintaan Koiyonon om Pomuwalaian, Datuk Seri Dr. Joachim Gunsalam suminasi’ ababayan pinisoinan pibatosan piuhupan id pialatan goduduo bohogian doid Hotel Magellan, Dutara Harbour di konihab (13tw Koonom).
Dr. Joachim minoboros, kopoburuan dilo’ koponumboyo’ di kogugunaan tutumombului i mumu’-gumu’ id watas ponombuluyan dilo’.
“Semporna nopo nga’ iso’ ririkoton ponombuluyan nointutunan id Sabah. Koburuon diti tantu’ no do koponumboyo’ di kogugunoon ponombuluyan mantad sunduk tiiyonon om kogogonopan di lobi kosonong,” ka disio.
Poingkuro po minoboros isio, projik dilo’ otimpuunan soira’ po do koundaliu i mogigiyon setinggan id koiyonon dilo’.
“Koiyonon di pinili’ montok kopoburuan dilo’ do noondo diti noponu’ do walai setinggan id pososorili’ dilo’. Intutunan tokou o mogigiyon nokoiyonon id koiyonon setinggan dilo’ montok poundolihon kumaa iso’ kokompungan di wagu.
“Tumanud pinongintoban tosopung, haro 200 luguan suang walai (KIR) i nokohompit id kopoundolihan diti. Pohoroon tokou ababayan pihompitan ponguludan miampai diolo’ di poinhompit,” ka disio i minoboros do hal diti maganu timpu montok salasaion.
Minoboros isio, LPPB poposodia’ soginumu’ 500 lot tana’, i kopohompit 21 ekar, montok tuduan dilo’.
Nokotindapou nogi’ i Monguhup Montiri I, Datuk Isnin Aliasnih; Ponorikohon LPPB, Datuk Masiung Banah; Monunurat Pointatap Komontirian, Datuk Jamili Nais om Potunud Cepat Hebat Sdn. Bhd. Wilson Chong om Goh Thian Teck.
