Masiung (tanga’) masaan onuan kointalangan karait do projik dilo’.
TONGOD: Kakadayan Tongod maan pomogoto’ miampai kopoburuan koiyonon komersial kigatang RM7 riong.
Projik monuridong duo rulud kadai mitimpak 12 unit dilo’ poindalanon do Kotinanan Pomuwalaian om Komogoton Kakadayan (LPPB) Sabah.
Ponorikohon LPPB Datuk Masiung Banah minoboros, projik dilo’ kotimpuun miampai fasa kumoiso’ kopoburuan kopohompit onom unit kadai miampai kos RM3.5 riong.
“Fasa kumoiso’ kopoburuan id tana’ kiginayo 1.17 ekar dilo’ maganu timpu 18 tulan montok momongo. Soira’ do opongo, tilombuson tokou fasa koduo,” ka disio ontok minooi intong koiyonon dilo’ di konihab.
Masiung po nogi’ ADUN Kuamut minoboros, duo unit kadai duo tingkat dilo’ pinaatag montok hotel, naamot unit nopo di suai nga’ gunoon montok pongindopuan komersial kaampai do kadai Kentucy Fried Chicken (KFC).
Minoboros isio linimpu komersial duo tingkat dilo’ padagangon pialatan RM565,000 om RM619,000 montok unit id sunduk.
