Dr. Joachim (wanan) pinapalahat ‘Bersatu’ miampai di Dr. Samuil om puru PBS Bohogian N.2 Bongkoka.
PITAS: Ponowoli Presiden Parti Bersatu Sabah (PBS), Datuk Seri Dr. Joachim Gunsalam minokianu puru ngaawi’ PBS do tumilombus misompuru om amu’ mogiurias.
Suai dilo’, pokionuon disio oinsanan puru do papalantoi Gabungan Rakyat Sabah (GRS) miampai monokodung isai nopo i poungkakaton id Lintuhun Undangan Pogun (DUN) Bengkoka ontok Pomilian Agayo Pogun (PRN) do obontol.
Dr. Joachim ontok pinapatahak booboroson disio.
“Nung amu’ tokou misompuru id pulitik, iti kapasanang di ponokosahap do lumantoi pomilian agayo. Miagal di id PRN nakatalib, do hiti nopo haro 10 calon Kadazan, Dusun, Murut om Rungkus (KDMR) om ponokosahap di ontok dilo’ nakalantoi miampai asanang,” ka disio ontok minoboros pinopoimagon Mitingan Agayo Toun-toun (AGM) PBS Bohogian N.2 Bengkoka id Dataran Futsal Bengkoka, do hiti, di konihab (ko 8tw Koonom).
Dr. Joachim i po nogi’ Kumoduo Boyoon Montiri II minanangkabahayan nogi’ kumaa Luguan Bohogian, Dr. Samuil Mopun om puruankuasa’ dau tu’ nakalantoi minomoruhang ginumu’ puru aparagat mantad 1,002 no tulun di toun 2020.
Dr. Joachim minonuntung tagung do inturu’ ponokotanda’ kinopoimaganan Mitingan Agayo Toun-toun PBS N.2 Bengkoka om sinasi’ di Dr. Samuil (id tohuri, kitupi’ opurak) om puru PBS di suai.
“Tadau diti oondos kopio kopio, yolo’ do babaino’ pasanganu kosompuruan katalib 4,000 puru aparagat om otumbayaan oku do kakal dilo’ aanu momoruhang,” ka disio.
Dr. Joachim minoboros, koporintaan GRS do noondo masaan moningkanan kumaa inggisaman monugat tongo’ kopotutan Sabah i poinsuang doid Pibatosan Malaysia 1963 (MA63) montok no do mogigiyon Sabah.
Ka disio, solinaid koporintaan Barisan Nasional (BN) minomorinta’ Sabah ilo’ id suang timpu 20 toun, tongo’ kopotutan Sabah miagal 40 pihatus amu’ pinosuul.
Dr. Joachim monongkirumo miampai puru PBS ontok suminuang id Dataran Futsal Bengkoka, di konihab.
“40 pihatus i sugaton nopo nga’ asil i pinuhu do Koporintaan Pisompuruan mantad watas Sabah sondiri’ om okon i ko’ mantad tongo’ pomogunan suai doid Semenanjung,” ka disio i po nogi’ Montiri Koporintaan Koiyonon om Pomuwalaian do pinopointalang.
Soginumu’ 569 puru mongongobi’ tuminindapou AGM dilo’.
Dr. Joachim (kaapat, gibang) minamaramit foom upalai kosompuruan mantad di Lightson Kohiya mantad Kampung Masin om sinasi’ di Dr. Samuil (kotolu, gibang).
Nokotindapou nogi’ i mio’ontong mantad koombolutan komponen GRS wookon diolo’ i Luguan Bohogian Parti Solidariti Tanah Airku (STARSabah) Bengkoka, Maklin Masiau; mobi’ Parti Maju Sabah (SAPP), Dr. Bristol Mokujal; Kumoduo Luguan Bohogian Parti Gagasan Rakyat Sabah (Gagasan Rakyat), Sotijin Juhui; Luguan Komulakan PBS, Christopher Mandut; Puru Kounsol Akawas PBS, Goon Thien Shang; Ponorikohon Manganganjur, Sungkim Rumangun; Tinimungan Koonduan, Tinimungan Komulakan om piipiro po Exco Komulakan PBS Longkod.
