KOTA KINABALU: Sabah nokoposurat 1,944 kes tibi gisom ko 4tw Kolimo.
Ilo’ nopo nga’ wookon mantad di 8.856 kes tibi nokosurat id pototongkop pomogunon.
Tumanud Utusan Malaysia, Montiri Kolidasan, Datuk Seri Dr. Dzulkefly Ahmad minoboros, tomporuruol tibi nga’ nosili nogi’ do kobolingkahangan tomporuruol agayo id pomogunon diti i nuru’ soibahan om tingkadan korolihon dilo’.
Pinabanta’ nogi’ disio soginumu’ 79 pihatus mantad kes malaria i nokosurat doid Malaysia di toun nakatalib noowit di kinorolihan malaria zoonotik.
Sundung kinorolihon malaria nokoiyonon kapaampai tulun nokosigampot numbur ‘sifar’ pointonod 2018 nga’, korolihon gama-gama’ owiton vektor maya’ korolihon malaria zoonotik kakal koinggorit do Malaysia.
Sunung do kaantakan korolihon malaria nokoingkuri-kuri’ id pomogunon diti nga’, mogigiyon amu’ kaanu osimbayanan kopio om amu’ momoduli’.
Nung intangan kes i nokosurat gisom ko 4tw Kolimo katatalib, soginumu’ 120 kes malaria kinorolihan tulun om 683 kes kinorolihan zoonotik nokosurat.
“Koinsanai mogigiyon kiguno papamanau tonggungan sompoopori montok manalob korolihon malaria kaampai no yolo’ i poingiyon id koiyonon poonsokid i poingkaraja’ id talun om tongo’ kokobunan.
“Yolo’ i kohompit id kaparagatan pihahambaan kopohompit talun kiguno maganu laang pongilagan malaria om opoduli’ di kointalangan kopongilagan korolihan malaria mantad Komontirian Kolidasan,” ka disio ontok pinopoimagon kopomoromitan Tadau Malaria, Tibi om Kusta Sompomogunan nayatan kabansaan, id Univositi Malaysia Sabah (UMS) di tadau baino’.
