Hajiji ontok minonorikohon Miitngan Puru Kounsol Akawas (AMT) Gagasan Rakyat id SICC, Kota Kinabalu, di tadau Minggu katatalib.
KOTA KINABALU: Mitingan nayatan raan Parti Gagasan Rakyat Sabah (Gagasan Rakyat) kotimpuun ko 1tw Koonom gisom ko 30tw Koturu’ 2024, ka di Monunurat Agayo dilo’, Datuk Mohamed Razali Mohamed Razi.
Ka disio, mitingan nayatan bohogian parti dilo’ maan pohoroo’ mimpuun ko 17tw Kowalu’ gisom 30tw Kosiam 2024.
Minoboros isio, Pitimungan Agayo Toun-toun (PAT) 2024 Gagasan Rakyat pinatantu’ do ko 9 om ko 10tw Kohopod om Iso’ 2024.
“Gagasan Rakyat babaino’ kiharo soginumu’ 74 bohogian pototongkop Sabah kaampai iso’ bohogian id Watas Pisompuruan Labuan om oinsanan raan kiguno papaharo mitingan ontok tadau di nakatantu’.
“Hal diti pinatantu’ doid Mitingan Puru Kounsol Akawas (AMT) Gagasan Rakyat di ko 17tw Kotolu 2024 i pinonorikohon di Presiden parti, Datuk Seri Haji Hajiji Haji Noor,” ka disio id kointalangan di tadau baino’.
Mohamed Razali Mohamed Razi
Mohamed Razali minoboros, Kounsol Akawas (MT) nga’ mokinau nogi di tongo’ bohogian popogura’ ababayan momoruhang puru parti kaampai tinimungan koonduan, komulakan om beliawanis.
“Kokito raramit om sokodung mogigiyon orukut tinaru pogun diti kumaa Gagasan Rakyat kotilombus koingkawas, kohondot dilo’ tongo’ bohogian kiguno papapanau kaparagatan momoruhang puru di wagu,” ka disio.
Minoboros isio, MT Gagasan Rakyat mokianu nogi’ koinsanai bohogian popogirot po do kukumaraja’ parti sabaagi posodiaan monoguang Pomilian Agayo Pogun (PRN).
Tumanud disio, sundung timpu Koporintaan Pogun Gabungan Rakyat sabah (GRS) – Pakatan Harapan (PH) Plus opupusan do wulan Kosiam 2025, nga’ posodiaan osopung kukumaraja’ pomilian agayo bohogian kiguno toririmo inggirotan.
Ka disio, MT Gagasan Rakyat nga’ mokianu nogi’ kopomuruanan parti dilo’ id nayatan bohogian om siriba’ popiromut pihunungan om piromutan ogirot miampai tongo’ lalansanon om puru koombolutan parti id komponen GRS-PH Plus.
“Pisokodungan om pisompuruan id nayatan kopomuruanan om puru Gagasan Rakyat miampai parti komponen GRS-PH Pluas kiguno pogiroton montok koundaran koporintaan om mogigiyon,” ka disio pinopointalang.
