KOTA KINABALU: Koupisan Kositum Diraja Malaysia (JKDM) Sabah nakapagahou sogirit om tinumon kaawuk mogisusuai pungaran id apat pinonungodan sopisuai doid pososorili’ Penampang om Sepanggar pialatan ko 6 gisom ko 18tw Kotolu katatalib.
Koinsanai gatang naahou kiginumu’ RM5.42 riong ilo’ nopo RM1.07 rion gatang naahou naamot, sukai om duti poinggompit kiginumu’ RM4.35 riong.
Tumanud Utusan Malaysia, Monguhup Luguan Potunud Kositum Zon Sabah, Datuk Mohd. Nasir Deraman minoboros, id apat pinonungodan sopisuai dilo’, bohogian disio nokokito 177,381.80 liter tinumon kaawuk om 930,000 watang sogirit mogisuai pungaran.
Minoboros isio, aiso’ pinomogombitan winonsoi ontok pinonungodan om ponoriukan potilombus masaan poindalanon montok mongilo sanganu sitor, sanganu padsakaian om mongungudar di poinhompit.
Ka disio, id pinonungodan kumoiso’ di ko 6tw Kotolu katatalib, kikiro jam ko 11.50 kosuabon bohogian disio nokoilo tinumon kaawuk sinoludup sumuang kumaa pomogunan diti maya’ Dodopiton Sepanggar.
“Pinomorisaan osopung nokokito soginumu’ 22,049.28 liter tinumon kaawuk miampai pinongintoban gatang RM167,133.54 om pikikiro gatang duty nogi’ sukai poinggompit soginumu’ RM850,837.62.
“Id pinonungodan koduo i winonsoi di ko 11tw Kotolu, kikiro jam ko 3.40 sodopon, puru Unit Operasi Pogirotkuasa’ minomonsoi pinonungodan kumaa sitor aiso’ numbur id Kampung Ramayah, Penampang om nokokito tinumon kaawuk om sogirot mogisuai pungaran i kotumbayaan amu’ sinukaian pinoopi’ id suang sitor dilo’.
“Ginumu’ tinumon kaawuk di naahou nopo soginumu’ 42,568.48 liter i kiginumu’ RM246,344.27 om sogirit naahou nopo soginumu’ 891,600 watang om pikikiro gatang kiginumu’ RM103,272.00 om sukai nogi’ duti di nakaampai nopo kiginumu’ RM975,013.44.
“Naahou nogi’ songinan luri om van i pinapakaing id koiyonon dilo’. Nosusuhut dilo’, iso’ po kawagu pinonungodan winonsoi di ko 14tw Kotolu om nokokito tolu tinan luri i kisuang tinumon kaawuk kiginumu’ 1,626.76 liter om sogirit mogisuai ponit om pungaran soginumu’ 38,400 watang miampai gatang koinsanai kaampai sukai om duti kiginumu’ RM1 riong,” ka disio id kapahabaran, doid Wisma Pogirotkuasa’, Sepanggar id tadau baino’.
Montok pinonungodan kotolu om kaapat i winonsoi id Dodopiton Sepanggar di ko 15 om ko 18tw Kotolu katatalib sopipoopori nokokito soginumu’ 89,088 liter om 22,049.28 liter tinumon kaawuk mogisuai pungaran, miampai ginumu’ koinsanai RM85,7600 om sukai nogi’ duti soginumu’ RM1.73 riong.
Mohd. Nasir minoboros, modus operandi montok kes tinumon kaawuk i numbalan mogowit sumuang maya’ Dodopiton Sepanggar nopo minomonsoi kinopomudolian kointalangan om pinopoimagon do babarang dilo’ sabaagi babarang suai montok monirung mato bohogian kikuasa’.
Daamot dilo, modus operansi montok kes sogirit om tinumon kaawuk i pinoopi’ id suang sitor aiso’ numbur nopo pinopolisok babarang aiso’ kositum miampai angkab mongilag sukai om maganu kosuulon pongindopuan id pidagangan nokoiyonon.
Montok dilo’, kes masaan soriukon id siriba’ Seksyen 135(1)(a) Akta Kositum 1967 ilo’ nopo minongudar babarang pogoduhan poinsuang id kointalnagan tolu (3), Jadual Kotolu, bohogian duo (2) Porinta’ Kositum (Pogoduhan Kokomoi Mongudar) 2023 om Seksyen 135(1)(d) Akta Kositum 1967 ilo’ nopo kasalaan popoopi’ barang pogoduhan.
