Haji Hajiji Haji Noor
TUARAN: Ababayan WeHelp Koupisan Balajaran Pogun Sabah monguhup nogi’ inggisaman Koporintaan Pogun papalantoi ababayan kopoburuan ‘modal insan’ id pogun diti, ka di Boyoon Montiri, Datuk Seri Haji Hajiji Haji Noor.
Ka disio, maya’ inggisaman ababayan diti, kapatahakan ponguhupan di potingkanan tantu’ no do kapanahak waya’ di osonong kumaa di mamaramit.
“Kalansananku kinapatahakan ponguhupan montok toun 2024 diti tadau baino’ kosigampot sondikoton dau om kaanu manahak waya’ di osonong kumaa tinimungan porikatan i tohuri nopo nga’ kouhup kumaa kopoburuan om komogoton pogun nogi’ kasasanangan mogigiyon.
“Koporintaan Pogun toririmo monokodung tikid inggisaman Koupisan Balajaran Pogun Sabah id kopongimbulaian modal insan di kitoilaan, kibalajaran om kikomilaan id pogun diti,” ka disio.
Minoboros isio dilo’ id ramai kinopoimpuunan Ababayan WeHelp, Kinapatahakan Ponguhupan Soromin Mato, Duli Sikul Susumikul om Cek Cura Koupisan Balajaran Pogun Sabah id Lintuhun Poingukab SMK Badin Tuaran, do hiti di tadau baino’. Teks boboroson disio binasa’ di Ponorikohon Eksekutif Innoprise Corporation Sdn. Bhd., Datuk Jasnih Daya.
Boyoon Montiri minoboros, ababayan miagal diti oponsol kopio montok monguhup koburuon balajaran tangaanak kopiongoi di lugu’ koduo Sondikoton Sabah Maju Jaya (SMJ) I kapaampai do modal insan om kasasangan mogigiyon.
“Tantu’ no do inggisaman om angkab maya’ laang Ababayan WeHelp Koupisan Balajaran Pogun Sabah diti, tikid susumikul id pogun diti ouhupan tumanud kogugunaan diolo’ sompoopori tumanud di kinoposuratan i naanu maya’ kinopogintongan gugunoon susumikul,” ka disio.
Daamot dilo’, minoboros isio, Koporintaan Pogun toririmo momoduli’ om manahak kopomodulianan di koyuon koposion koinsanai mogigiyon, kaampai no balajaran tangaanak Sabah lolobi tinimungan B40.
Ka disio, iti mantad no do yolo’ nopo nga’ modal insan di mongoput ababayan koporintaan maya’ Sondikoton Palan Koburuon SMJ.
“Ilo’ pogi’, Koporintaan Pogun pinoposodia’ pipiro ababayan ponguhupan balajaran susumikul sikul wookon dilo’ Ponguhupan Tunai Koporojistoran IPT Miampai ‘One-Off’ (BUDI), Ponguhupan Ihsan Komputer (BAIK), Ponguhupan Tunai Poporisaan (BAKTI) om Gaa’ Abantug Balajaran Sabah (AKS).
“Suai ko ilo’, Koporintaan Pogun nga’ minomoruhang nogi’ kousinan Sikulasip Koporintaan Pogun mantad do RM50 riong no kuminaa RM101 riong sontoun. Iti montok papatantu’ lobi kogumu’ tangaanak Sabah i kikosudongan, kikosiwatan kaanu sikulasip id inggisaman diolo’ mongoput balajaran kumaa nayatan lobi kasawat.
“Koinsanai ponguhupan diti okon nopo ko’ nakapanahak ogumu’ koundaran kosuul no id kopoingkurian tonggungan kousinan tinimungan mosikin om B40, nga nogi’ montok papatantu’ aiso’ tangaanak i koindisan mantad kaanu kosiwatan balajaran id pogun diti,” ka disio.
Ka disio, laang diti kopiongoi di inggisaman montok mongimbulai lobi kogumu’ tinimungan kibalajaran om kopoburuan modal insan miagal di poinsuang id rikoton Katatapan Sondikoton SMJ dilo’.
Monongkounsikou nogi’ isio kumaa koinsanai mononoluod ponguhupan kumaa susumikul id pogun diti miagal do Longkod Zakat Sabah, Permodalan Malaysia Berhad (PNB) om Perbadanan Baitulmal Pogun Sabah.
