Hajiji tuminabi’ miampai di luguan koupisan Pisompuruan id Ramai Amanat om Pitimungan Puru Surupukaraja’ Koporintaan Pogun om Pisompuruan Toun 2024.
KOTA KINABALU: Koporintaan Pogun tumilombus papatantu’ koposion mogigiyon Sabah oobian di inggisaman po’ompus manalasai hal kapaampai kogugunoon mogigiyon kosuul no lotirik, waig, pomuwalaian om susuai po, ka di Boyoon Montiri (KM) Datuk Seri Haji Hajiji Haji Noor.
Ka disio, kobolingkahangan dilo’ notoguang do mogigiyon Sabah do solinaid diti, miampai amu’ monondos nombo-nombo bohogian, koporintaan buruanon disio pointonod wulan Kosiam 2020 pinopoindalan mogisusuai laang montok mamajamin koposion mogigiyon lobi kosimbayan.
“Pinopoimpuun tokou do Sabah Energy Roadmap & Master Plan 2040 di wulan Kosiam toun nakatalib sabaagi inggisaman sumimban mantad intodonon ginoris amu’ aanu monginwagu miagal do gas sandad om tumalahan do piromutan baang id Sabah.
“Kopokionuan pangaba’ ginoris lotirik di mumu’-gumu’ do noondo diti aanu monoibau miampai monginsikap kopolobusan ‘hidroelektrik’ montok momogonop kopomogunaan pomorunan di nokoinggumu’ id pogun diti. Ginoris oinwoguan miagal solar, biomas om biogas kopomogonop po do ginumu’ kopolobusan ginoris lotirik id Sabah,” ka disio.
Minoboros isio dilo’ id Ramai Amanat om Pitimungan Puru Surupukaraja’ Koporintaan Pogun om Pisompuruan Toun 2024 id Longkod Konvensyen Sompomogunan Sabah (SICC), do hiti di tadau baino’.
Hajiji minoboros, Projik Hidroelektrik Ulu Padas id Tenom i pikikiro opongo do 2029, kopoinggayo po do kapatahakan pangaba’ lotirik miampai koporomut ponongkoiyonon kabaatan om kabaatan kosilahon Sabah potilombus dino kowonsoi piromutan ginoris di lobi otimbang.
Ka disio, projik dilo’ kouhup nogi’ manalasai kokurion pangaba’ waig id timpu anaru miampai kopoimbulayan 6,000 riong liter waig sangadau. Projik dilo’ nga’ kosili nogi’ do “game changer” kumaa pogun Sabah potilombus dino kajamin koposion di lobi kosonong om ogonop do timpu dumontol.
Minoboros isio, montok papatantu’ pangaba’ waig kosili lobi otimbang, koporintaan nga’ minomoruhang nogi’ do ginumu’ pangaba’ waig id Loji Pongusapan Waig Telibong 1 om 2, soginumu’ 130 riong leter sangadau gisom 160 riong liter waig sangadau i kapangaba’ waig id koiyonon Koibutan Kota Kinabalu kaampai id Tuaran, Taman Pomorunan Kota Kinabalu (KKIP) om Univositi Malaysia Sabah (UMS).
