James Ratib
KOTA KINABALU: Sundung do 60 toun no Malaysia nokosigampot kinopomorintaan sondiri, kakal haro kikiro 100 tinan kolinik kolidasan winonsoi mantad kayu i poindalan.
Tumanud Utusan Malaysia, Montiri Koburuon Mogigiyon om Kasasanangan Mogigiyon po nogi’ Exco Kolidasan Pogun, Datuk James Ratib minoboros, koyuon dilo’ kopoikum-ikum om lumansan do 2025 oinsanan kolinik kayu dilo’ oinsonongan kumaa konkrit.
“Id Semenanjung aiso’ no. Okon toi ko’ kopoikum-ikum iti dati’ tu’ kakal miampai birokrasi i koponginrulan kopoindalanan tongo’ projik pamansaian koliniki kolidasan id pogun diti.
“Mimang tokou do aiso’ no kolinik kayu id Sabah miagal id Semenanjung sabab 60 toun mordika kakal po do kayu. Id mitingan pia, Sabah no i ogumu’ kolinik kolidasan kayu, osonong po tu’ mogigiyon labus kakadayan otoboi do koyuyuon miagal dilo’,” ka disio.
Minoboros isio, pointonod 2009 gisom toun nakatalib, soginumu’ 23 projik id siriba’ Komontirian Kolidasan Malaysia (KKM) ginayat kawagu sabab amu’ nosiwatan pinopoindalan mantad no do mogisusuai hal kaampai kobolingkahangan tana’, waig, lotirik om sopiagal dilo’.
Ka disio, kobolingkahangan dilo’ mantad no do aiso’ pibarasan om pisokodungan id pialatan kotinanan pogun om Pisompuruan montok manalasai hal kopogonuan tana’ om susuai po hal.
“Ilo’ no sabab yoho’ sabaagi Exco Kolidasan minomolohou Pesuruhjaya Tana’ Pisompuruan om Potunud Tana’ Pogun montok mindikau miniboboros manalasai hal tana’ kapaampai 22 kolinik kolidasan id Sabah.
“Noondo diti, kobolingkahangan tana’ kapaampai 22 projik nasalasai no om iso’ projik nopo nga’ ginayat kawagu ilo’ nopo nga’ projik kopoburuan id Hospital Duchess of Kent, Sandakan. Projik ngaawi’ miagal diti kiguno pohoroon koponusuhutan mooi do koponuridongan dilo’ aanu popoindalan tosisikap,” ka disio.
