Hajiji (poindikau, tanga’) miampai JKKK Sulaman om Pantai Dalit.
TUARAN: Boyoon Montiri, Datuk Seri Haji Hajiji Haji Noor minonuhu’ puru Puruankuasa’ Koburuon om Koumoligan Kampung (JKKK) papamanau tonggungan diolo’ sabaagi ejen kosimbanon om mongobi’ koporintaan i toririmo manahak kopointalangan om kointalangan otopot kumaa mogigiyon.
“Karaja’ diti wookon posuulon montok papatantu’ mogigiyon amu’ obingampawong di hal tangaraat i toririmo minggisom mongurias mogigiyon om momidsala’ kaadangon pogun om pomogunon.
“Iso’ mantad karaja’ osuul nopo nga’ montok popironit piromutan ogirot om pisompuruan id nayatan mogigiyon orukut tinaru suai ko’ monguhup koporintaan popotonu’ katatapan nogi’ koburuon i nokoindalan om maan poindalano’ id pogun diti, kosuul no inggisaman ngaawi’ Hontolon Sabah Maju Jaya (SMJ),” ka disio.
Minoboros id ramai kinapatahakan watikah kinoposilihan (2023-2025) kumaa JKKK DUN Sulaman om Pantai Dalit id Lintuhun Seri Sulaman do hiti konihab, i Boyoon Montiri minokianu nogi’ koinsanai Ponorikohon om nogi’ puru ngaawi’ JKKK mooi do toririmo popoindalan pamalanan kohunung, popokito kinotopoton om kinoponigoton nogi’ momoguno sunduan misokodung sabaagi iso’ tinimungan id inggisaman mongingkawas rontob koposion mogigiyon om popoburu’ kinoiyonon sompoopori.
“Momoguno oku JKKK i aparagat om pointotopot momomonsoi pamalanan om kopoindalanan ababayan toi projik id kampung, suai ko’ popogura’ nogi’ kogompitan mogigiyon nokoiyonon.
“Kada’ nopo soira’ silihon sabaagi lansanon, momusorou nopo do projik, amu’ mindahu’, amu’ sumokodung kaampai no popoindisan diolo’ i amu’ potogiulu do koporintaan.
“Ponorikohon om puru puruankuasa’ JKKK kiguno opoduli’ di tikid kobolingkahangan mogigiyon id kinoiyonon sompoopori om papatahak kointalangan kopohompit ponguhupan koporintaan kumaa mogigiyon,” ka disio.
Institusi JKKK nopo nga’ iso’ tinan toi kukumaraja’ i oponsol id nayatan siriba’, ka disio.
Tumanud disio, pointonod pinonuridongan dilo’ di toun 1962, tonggungan om karaja’ JKKK potilombus kosudong gisom no do babaino’ diti sabaagi mato om tolingo nogi’ popiromut do koporintaan om mogigiyon gisom id nayatan guas.
Kohondot dilo’, Hajiji minoboros, Koporintaan Pogun tumilombus do monginggirot kotinanan diti kosuul no id sunduk kopomuruanan om kopulokison ponguludan kampung.
Iti kopiongoi di tonggungan Koporintaan pogun i tumopot do papatantu’ koburuon ikonomi id koiyonon kakadayan om labus kakadayan koindalan miampai poinsonong maya’ ponguhupan ouli’ mantad JKKK, ka disio.
Natag po nogi’ disio oinsanan mobi’ rayat do popohompit JKKK id tikid pamalanan om kopoindalanan koburuon id labus kakadayan.
Hajiji minongunsub mooi do Ponorikohon om puru puruan JKKK popogura’ koinsanai biro, montok amu’ kopomohimpogong inggisaman koporintaan popoburu’ pogun om monguhup mogigiyon.
Haro 11 Biro Puru Puruankuasa’ id kotinanan JKKK wookon dilo’ Biro Koburuon Kogogonopan; Koumoligan om Kolidasan; Ponguludan Kousinan; Ikonomi om Mongindapu’; Kasasanangan om Kolumison; Balajaran om Inovasi; Kotundunan om Kesukarelawanan om Hal Koonduan om Paganakan.
Hajiji minoboros, tonggungan biro ngaawi’ diti koowit iso’ kosimbanon om waya’ di agayo id koponguhupan Palan Hontolon SMJ i buruanon Koporintaan GRS minsomok om monguhup mogigiyon.
“Kalansanan ku nogi’ mooi do koinsanai JKKK minggisom mongingkawas toilaan om komilaan do po’ompus montok monginggirot ginaras om karaja’ sabaagi lansanon om mongungulud id nayatan bobos siriba’,” ka disio.
