Tun Juhar (tanga’) miampai di Hajiji (kotolu, gibang), Liew (koduo, wanan) om i Safar (gibang) minamagaur om pinoposimbuat Yee Sang.
KOTA KINABALU: Lobi 10,000 tulun mantad oinsanan nayatan mogigiyon tuminindapou walai poingukab Toun Wagu Sina pinaanjur Koporintaan Pogun om Pisompuruan Koisaan Cina Sabah (FCAS).
Ababayan id Longkod Konvensyen Sompomogunan Sabah (SICC) do hiti di tadau baino’ nokosindak nogi’ rinamai mantad kinorikotan di Molohingon Pogun (TYT), Tun Juhar Mahiruddin om sawo, Toh Puan Norlidah R.M Jasni miampai di Boyoon Montiri (KM) Datuk Seri Haji Hajiji Haji Noor om sawo, Datin Seri Datuk Juliah Salag.
Tun Juhar om i Hajiji miampai tongo’ tombului nalap di suai id sinasawat doid Plaza SICC montok gimik kinopoimpuunan.
Sinuau yolo’ di Ponorikohon Manganganjur, Datuk Christina Liew i po nogi’ Montiri Ponombuluyan, Koubasanan om Sandad Posorili’ nogi’ tongo’ Montiri Kabinet di suai.
Ontok kinorikotan, tombului tangapantang om tombului nalap sinuau di pokikitanan sayau mondou om replika Naga kininaru 350 kaki’ id Plaza SICC.
Tun Juhar om i Hajiji sinuau do mogigiyon id Ramai Walai Poingukab Toun Wagu Sina’ Koporintaan Pogun.
Id lintuhun agayo, tongo’ tombului linihis di mogisusuai pokikitanan koubasanan om kawawagu.
