Hajiji tuminabi’ dilo’ tongo’ Puru Lintuhun Undangan Pogun (ADUN) id kinorikotan disio doid Pitimungan Pinotomod DUN di tadau baino’.
KOTA KINABALU: Boyoon Montiri (KM), Datuk Seri Haji Hajiji Haji Noor minoboros, hal agayo i koowit kumaa kobolingkahangan pangaba’ lotirik do noondo diti okon nopo ko’ mantad di kinokurion kapasiti kopongimbulaian, nga nogi’ mantad di kinoingkawason kogunaan moomoguno (mantad kososolugan 900 Megawatt kumaa 1,100 Megawatt id timpu sontoun) nosusuhut di kinoburuon ikonomi i asarok id Sabah.
Mantad no dilo’, minoboros isio, kopiongoi di Palan Induk Hontolon Tenaga Sabah 2040 (Sabah Energy Roadmap and Master Plan 2040 toi SE-RAMP 2040) i pinoimpuun di ko 19tw Kosiam 2023, tingkananon Koporintaan Pogun nopo nga’ montok papatantu’ Palan Koburuon Kopolobusan timpu oniba’ koindalan tumanud ‘fast track’ montok mamagampot ‘jidar’ nokoopi’ kopolobusan (Generation Spare Capacity) kumaa rontob ogirot ilo’ nopo 30 pihatus do osisikap miagal posushut:
• Poniwaan tongo’ set janakuasa momoguno pomurikit disel gisom 100 Megawatt do mogisusuhut ilo’ nopo 40 Megawatt di wulan Kohopod om Duo 2023 om 60 Megawatt do wulan Kotolu 2024.
• Kopongoputan kopoindalanan loji janakuasa’ momoguno pomurikit disel di haro mantad id Tawau soginumu’ 70 Megawatt.
• Kopomongohan projik Solar Kitukuran Agayo (Large Scale Solar toi LSS) soginumu’ 62 Megawatt do toun 2024.
• Atag pamasangan Battery Energy Storage System (BESS) soginumu’ 100 Megawatt do toun 2024.
• Poniwaan loji mimpau gas 100MW montok timpu interim gisom loji gas pointatap 100MW opongo momonsoi.
• Kopoindalanan tongo’ intodonon Ginoris Otomou (Tenaga Hijau) maya’ ababayan Tarif Galakan (Feed in Tariff) mantad intodonon mini hidro kikapasiti 31.6 Megawatt om ‘biogas’ kikapasiti 5.6 Megawatt do toun 2024.
• Pomoruhangan projik Solar Kitukuran Agayo (Large Scale Solar toi LSS) soginumu’ 100 Megawatt do toun 2025.
Boyoon Montiri minoboros, suai ko ilo’, montok papatantu’ kotilombuson kapasiti ‘penjanaan’ di korungod, Palan Kopoburuan Penjanaan timpu gonsuhatan om anaru nga’ poindalanon nogi’ i wookon dilo’ kapaampai pomoruhangan kapasiti penjanaan mantad intodonon hidro kiginumu’ kikirao 400 Megawatt, projik Solar Kitukuran Agayo kiginumu’ 100 Megawatt om susuai projik penjanaan.
“Suai ko ilo’, haro nogi’ projik piromutan kapaatadan agayo 275 kiloVolt ilo’ nopo kapamangahan piromutan kapaatadan ‘sambung-tara’ grid Sabah miampai Sarawak om projik piromutan kapaatagan ‘Southern Link. Iti koponginggirot po do kapasiti om kaadangon grid Sabah montok mamaramit kopokionuon pomogunaan agayo lolobi no mantad tongo’ momoguno pomorunan do timpu dumontol,” ka disio id Pitimungan Pinotomod Lintuhun Undangan Pogun (DUN) Sabah di tadau baino’.
