Hajiji pinapawalad Rang Undang-Undang (RUU) Pangaba’ Lotirik 2024, Ginoris Oinwoguan 2024 om Suruhanjaya Tenaga Sabah (Ponimbanan) 2024 id Pitimungan Pinotomod DUN Sabah di tadau baino’.
KOTA KINABALU: Boyoon Montiri, Datuk Seri Haji Hajiji Haji Noor minoboros, miampai Koporintaan Pogun monowoli kuasa’ kapanamangan di pangaba’ lotirik om ginoris oinwoguan, iti kapasanang do palan ogirot montok pangaba’ ginoris ogonop id Sabah.
“Inggisaman diti kapanah koundaran kumaa koburuon sosio-ikonomi pogun maya’ koposodiaan pangaba’ ginoris di kogonop, ogirot, poinpatut om po’ompus miagal id Palan Induk Hontolon Tenaga Sabah 2040 (SE-RAMP 2040) i winonsoi do Suruhanjaya Tenaga Sabah (ECoS) om pinoimpuun di wulan Kosiam toun nakatalib montok monokodung palan Hontolon Sabah Maju Jaya,” ka disio.
Boyoon Montiri minoboros, Koporintaan Pogun maya’ ECoS papatantu’ koindalanon koponowolianan kuasa’ panamangan pangaba’ lotirik kapanau miampai kiwaya’ om oulud miampai aiso’ nunu-nunu kapamagangahan kumaa tongo’ mongingigit tonggungan id pomorunan pangaba’ lotirik id pogun diti.
Minoboros isio, inggisaman dilo’ nga’ wookon nogi’ mantad kinapatahakan kuasa’ id siriba’ Pibatosan Malaysia 1063 (MA63).
Lintuhun Undangan Pogun pinopolulus tolu Rang Undang-Undang id pitimungan pinotomod di tadau baino’ i kapanahak kosiwatan kumaa Sabah montok miampai pohimagon monowoli kuasa’ manamong siktor pangabaan lotirik om ginoris oinwoguan mantad Koporintaan Pisompuruan.
Iti kapaampai Rang Undang-Undang (RUU) Pangaba’ Lotirik (Bekalan Elektrik) 2024; Ginoris Oinwoguan (Tenaga Boleh Baharu) 2024 om Suruhanjaya Tenaga Sabah (Ponimbanan) 2024.
Katalib kinopoimaganan enakmen dilo’, ECoS kosili tinan kikuasa’ i manamong do siktor pangabaan lotirik om ginoris oinwoguan id Sabah poinggirotkuasa’ misindikot.
ECoS nakaanu no do kuasa’ manamong kopoindalanan montok siktor pangaba’ gas tindal pointonod di ko 10tw Koiso’ toun nakatalib.
