Hajiji pinopoindalan gimik kinopoimaganan Kounsol Sipoot Sabah (SAGA).
KOTA KINABALU: Koporintaan Pogun pinopoobi’ RM27.13 riong montok mongulud om popoburu’ pomorunan sipoot id pgoun diti do toun obontol.
Boyoon Montiri, Datuk Seri Haji Hajiji Haji Noor minoboros, kinopoobian diti nga’ montok papatantu’ lobi po kgoumu’ bakat tongomulok id kaganaan sipoot aanu momologkus montok mongingkawas po do naangayan sipoot id pogun diti.
“Pokionuon ku Komontirian Komulakan om Sipoot do tumilombus mongunsub kogompitan mogigiyon kosuul no tongo’ bakat tongomulok id kaganaan sipoot montok mongingkawas po do naangayan om kalantaion kaganaan sipoot id pogun diti.
“Oponsol kopio montok dati’ mongimbulai pamalapau sabaagi bakat wagu id koinsanai nayatan sipoot. Palan diti nopo nga’ iso’ tonggungan pamalanan timpu anaru montok momogonop bakat di gunoon.
“Koporintaan pointotopot popoburu’ sipoot id pogun diti om okito miampai pinonuridongan nogi’ kinoposodiaan ogumu’ kogogonopan kumaa tangaparagat sipoot. Inggisaman kopiongoi di angkab tokou montok mongimbulai atlet kitopong pomogunan,” ka disio ontok pinopoimagon Sipoot Sabah (SAGA) edisi ko-10 id Stadium Univositi Malaysia Sabah (UMS) do hiti, di konihab.
Minonongkounsikou nogi’ isio kumaa toinsanan atlet Sabah i nokopomowongi’ ngaran pogun om pomogunon id pipiro ababayan sipoot id naampai id suang nogi’ labus pogun.
“Ounsikou oku tu’ kikosiwatan miampai tongo’ atlet om mimparagat sipoot do sodop diti.
“Pinoilo oku do Sipoot Sabah diti baino’ naampai somok 7,000 mimparagat sipoot kaampai atlet om upisor. Iti nopo iso’ tintob di agayo kopio om iti atalang kopokito tinopot om tonggungan di agayo kumaa mimparagat sipoot montok papalantoi,” ka disio.
Hajiji pinapatahak tandamato kuminaa momuruan kontinjen tiim i tuminanding kopihondot kinopoimaganan Kounsol Sipoot Sabah (SAGA).
Kohondot dilo’ ka disio, koporintaan pogun papatantu’ Sipoot Sabah diti kotilombus oinggarasan.
“Iti kaampai no miampai momonsoi ponginsonongan id koinsanai sunduk mooi do kotilombus kosudong sabaagi impohoron montok momologkus bakat om mongimbulai atlet kinaangayan i aanu pointangaon gisom kumaa nayatan sompomogunan,” ka disio.
Poingkuro po pinokianu disio koinsanai atlet mooi do amu’ kalawong toi obinsontob ginawo, di kinalantaion i naanu.
“Nga’ sunduan di posingkalab kiguno tilombuson tokou. Kiguno tokou tumungag sabab koporintaan pogun nga’ papaatod atlet montok umampai pialaan Sipoot Malaysia (SUKMA) id Sarawak do wulan Kowalu’ 2024,” ka disio.
