Haji Hajiji Haji Noor
KOTA KINABALU: Pisompuruan Pomorunan Sabah (FSI) nunsub tumilombus misokodung, miagal do Ekspo Sompomogunan Sabah (SIE), montok popointutun pongindopuan om pidagangan do mongimbayat lobi kogumu’ mangangapu’ saalom om sompomogunan kumaa Sabah.
Boyoon Montiri, Datuk Seri Haji Hajiji Haji Noor monongkounsikou nokoilo do FSI pinopiuhup ginoris miampai tongo’ momuruan pomorunan do popogura’ ikonomi Sabah.
“Pisokodungan om piuhupan pialatan puru pongindopuan om koporintaan nopo nga’ kunci montok papatantu’ koturunduson kopoindalanan ababayan kopoburuan tokou i okon nopo ko’ kapanahak koundaran kumaa pogun tokou nga’ nogi’ kouhup miampai atalang kumaa kotundaon pogun,” ka disio id Sodop Gala Kouliton Toun FSI ko-40 id Lintuhun Hakka do hiti di songkosodop. Boboroson disio binasa’ di Kumoduo Boyoon Montiri II po nogi’ Montiri Koporintaan Koiyonon om Pomuwalaian, Datuk Seri Dr. Joachim Gunsalam.
Hajiji minoboros, koporintaan pogun toririmo mamagatang sokodung siktor swasta sabaagi tambalut miuhup id komogoton om koburuon Sabah.
“Tantu’ nopo dokoporintaan pogun pointotopot do momuruan om mongunsub waya’ koburuon montok koinsanai mimang buru’. Ababayan kopoburuan tokou id siriba’ Palan Kopoburuan Hontolon Sabah Maju Jaya (SMJ) i moningkanan kumaa tolu tingkananon kopio pomutanaman, pomorunan om ponombuluyan sabaagi tingkananon kosunion ikonomi nogi’ modal insan om kasasanangan mogigiyon, piromutan kogogonopan om kotilombuson otomou, nokopomiuwa’ asil dumontol toun kotolu,” ka disio.
Boyoon Montiri minoboros, Sabah nokoposurat naangayan osonong id kopoopuan saalom om labus, okito mantad tulan Koiso’ gisom Kosiam 2023, hinombo pogun diti nokoposurat kopoopuan kigatang RM10.2 bilion, minongimbulai 891 pakarajaan mantad 99 projik.
Iti kopongobi’ 13 projik mantad siktor pamansaian, turu’ mantad siktor agayo (perlombongan, pomukobunan om komoditi) om 79 mantad siktor surupukaraja’ (hartanah, pidagangan om kopoikidan, ponombuluyan om utiliti).
Minoboros isio, pinonuridongan tinimungan kukumaraja’ kopoopuan pogun di kitonggungan nokopokito tonggungan koporintaan pogun montok poposodia’ sokodung poinpuli, pangahakan om pososorili’ di osimbayan montok mangangapu’ koburu’ om kalantoi.
Koporintaan pogun minaganu laang aparagat montok papatantu’ kopoopuan id Sabah kotilombus oturundus id kaganaan miagal siktor ginoris, produk mimpau tiknologi otomou, produk ‘hiliran’ biojisim, tumau om gas nogi’ ponombuluyan, ka disio.
Hajiji minoboros, Sabah mamaramit mangangapu’ montok mintong kosiwatan kopoopuan om pongindopuan id pomorunan wagu, kaampai konsep ‘Ekonomi Biru’ i wagu pointutunai ilo’ nopo pomogunaan pointatap intodonon marin montok kopoburuan ikonomi do mongimbulai pakarajaan om mongingkawas rontob koposion walai.
Minoboros isio, sasabab no do Sabah po nogi’ iso’ mantad Watas Kosunion ASEAN Kosilahon Brunei Darussalam – Indonesia – Malaysia – Filipina (BIMP-EAGA), pogun dilo’ kaanu lumansan do pisarabakan ikonomi lobi poinralom id ponongkoiyonon diti om nosili piromutan songkoiyonon montok pamansaian, maritim om padsakaian koponumboyo’ di kogugunoon tongo’ pomogunan tumunda’ om poinggirot id labus tisan rahat Sabah.
“Mamarayou oku inggisaman FSI montok okon nopo mintong Sabah koburu sabaagi hab ikonomi nga’ angkab dau montok mongumolig, mongunsub om papatantu’ koyuyuon pongindopuan di aadang, osimbayan om otulid padarapas koinsanai pomorunan. Tuduan dokoyu kopiongoi di angkab koporintaan pgoun montok popoburu’ pomorunan sabaagi iso’ mantad tingkanon kopio do SMJ.
“Ounsikou oku nogi’ kokito tonggungan FSI potitilombus popogirot sunduan kopomuruanan pomorunan, popisompuru intodonon, monuridong ikonomi om momonsoi inggisaman miuhup do popointutun ralan om kosiwatan wagu montok poposiau pomorunan om ikonomi tokou kumaa toguang.
“Bayahan, FSI om puru di kapantangan, mantad kinoburuon id agayo kopio i nosigampot po’ompus apat nohopod toun diti. Koporintaan pogun mongunsikou kinouhupan miagal FSI montok momogusa’ lobi kogumu’ kosiwatan montok mogowit Sabah kumaa rontob potilombus,” ka disio.
